Thode: No tin base pa un reconteo di voto di e eleccion Parlamentario di diabierna

ORANJESTAD – E resultado di eleccion di dia 25 juni 2021 a keda oficialisa como esun definitivo. Como tal no tin cambio den e resultado manera cu esaki a keda anuncia inicialmente y no a haya base legal pa haci un reconteo manera cu varios partido politico a pidi. Asina presidente di Conseho Electoral Glenn Thode a bisa durante e reunion cu a tuma lugar diaranson mainta na Censo pa establece e resultado definitivo.  E reunion aki a keda transmiti via livestream di Censo pa tur hende mira ya cu paden no a permiti publico ni prensa, sino solamente representantenan di partidonan politico cu a participa na e ultimo eleccion. 

DESORDEN DEN SALA

Mayoria di e partidonan politico presente den e sala a haci nan pregunta riba e tema di reconteo. Dado momento a ripara cu e preguntanan tabata mescos y a cuminsa buta ordo den e sala, pidiendo esnan cu e pregunta pa stop pasobra nan tabata drenta den ripiticion. Y ora cu esaki tabata mustra di no kier a ogra, e presidente Thode, a menasa di saca nan pafo, si nan no duna oido na su palabra di orden. Aki esnan presente a duna oido y no a bira necesario mas pa saca hende di e sala. 

NO TIN BASE

E loke a resalta di e reunion cu a dura algo mas cu un ora, ta cu segun sr Thode, esnan presente cu tabatin keho, no por a presenta ningun prueba of base legal cu ta hustifica un reconteo di e votonan. E puntonan presenta segun Thode, tabata critica nan pero no cu prueba of base pa pues hustifica un reconteo. Cu esaki, a dicidi cu e reconteo cu a pidi, no ta bay tuma lugar y cu tur loke a wordo cuestiona, a sosode riba e anochi di eleccion mes y cu a atende cu tur esaki caba y aki tampoco no a mira ningun motibo valido pa haci un reconteo. 

DESACUERDO

Ta notable cu e splicacion di tanto e presidente di Conseho Electoral como e director di Censo, respectivamente Glenn Thode y Sharin Luydens, no a keda acepta pa e representantenan di partido politico y cu posiblemente no a tende lo ultimo di nan. Hecho ta cu CE a certifica e resultado y a informa cu e resultado presenta, ta esun cu ta valido y oficial awor. Y cu dia 7 di juli proximo ta huramenta un parlamento nobo.