Conseho Electoral ta sigura cu tur keho riba reconteo a keda atendi caba

ORANJESTAD – Awe mainta Conseho Supremo Electoral ta bin hunto pa establece e resultado oficial di e eleccion Parlmentario di siman pasa diabierna. Tin indicacion di por lo menos un partido politico cu kier forza un reconteo diaranson (awe) ainda di e votonan, y particularmente esnan invalido, pasobra lo tin hopi y cu tin discrepancia di voto. Investigacion cu e portal aki a haci, ta mustra cu ley ta duna cu e conteo ta sosode den e urna y e urna ta pone e resultado den un proces verbaal. E reunion di awe mainta ta pa establece esaki oficialmente. 

DUDA DEN CONTEO

E investigacion di e portal aki, ta mustra cu si acaso den e reunion ey hoofdstembureau tin indicacion pa habri urna of tin keho cu motibo, por dicidi di habri un urna pero den e caso aki a compronde cu no tin te awor ningun motibo. 

KICO TA PASA CU E TASNAN CU VOTO

Di ora e esnan cu ta conta na e urnanan y nan yega cu e tas, e ta keda cera y e personal di Conseho Electoral hamas ta habri nan. Ta e procesverbaal nan ta procesa den e sistema via e programa di excel. Y esey ta wordo estableci durante e reunion di awemainta 10’or. 

CONTEO PROPIO TA TUMA LUGAR?

A compronde cu nunca Conseho Electoral ta haci un reconteo  riba nan mes, pior mishi cu e tasnan. Despues cu e resultado wordo estableci,  e process  verbaalnan aki nan copia ta bay Staten conforme Art 102 kiesverordening. AVP

A compronde cu e intencion ta pa durante e reunion di awe mainta, e partido en cuestion pidi pa un reconteo, siendo cu esaki a tuma lugar caba diabierna y atendi. Esaki lo crea un situacion ‘interesante’ y no ta conoci si esaki ta possible, y si por considera esaki un tipo di ‘disturbio’ intencional, cu pa ley, no ta wordo permiti. A compronde tambe di parti di e partido en cuestion cu ta cuestiona seriamente e forma con esnan cu ta dirigi Conseho Electoral, ta anda cu e leynan. Di parti di e mando, e portal aki a compronde cu e kiesverordening ta stipula tur cos corecto, pues esnan cu kier tin intencion di exigi un reconteo por ehempel, lo no a lesa e ley bon.