Ambulance cu sirena a dal den un auto cu no kier a hala pe

ORANJESTAD – Un ambulance cu sirena a dal den un otro auto cu no a hala pe na altura di Cayena Mall diamars mainta tempran. E auto ey a bay dal den un otro auto. E chauffeur di e auto cu lo a ocasiona e accidente a core bay, pero polis a gare despues. E impacto tabata bastante pa e auto en cuestion y e ambulance a haya basta daño banda robez, unda cu e dos tirenan a keda kibra y e parti pa subi riba e ambulance a keda ranca completo. E auto su front a keda total loss y e auto number tres a haya sla parti patras. E chauffeur y e otro persona den e ambulance no a haya sla pero si a keda cu poco susto. Polis di trafico a bin na e sitio pa atende cu e situacion mientras cu e personal di ambulance a reemplasa e ambulance en cuestion y e hefe di ambulance a bin na e sitio pa atende cu su coleganan.