Aruba ta organisa prome “Health Care Conference ” na juni

ORANJESTAD – Riba peticion di di e Inter Parlamentair Koninkrijksoverleg (IPKO), gobierno ta organisa e “Health Care Conference Aruba 2015” cu ta tuma luga den Renaissance Convention Center entre dia 1 y 4 di Juni 2015. Minister di salud Alex Schwengle a anuncia esaki ayera. Meta di e congreso ta pa logra y reenforsa colaboracion entre diferente paisnan den Caribe Hulandes, cu e proposito na yega na solucionnan pa retonan comun den area di salubridad.

“E necesidad pa e conferencia aki entre paisnan den Reino ta grandi y ta pa e motibo aki cu mi a bishita esunnan envolvi na Hulanda y otro islanan den reino pa yega na e structura di deseonan y programa”, asina e mandatario encarga cu Salubridad ta splica. “Trahando hunto nos por traha riba calidad di cuido y tambe riba e situacion financiero di salubridad”, asina Minister Dr. Alex Schwengle a enfatisa. E temanan lo wordo presenta pa entre otro, pa oradornan di Erasmus University di Rotterdam, TIAS/NIMBAS di Tilburg, Harvard University, Be Bright Foundation di Belgica, PAHO, Baptist Health International di Miami y World Bank.

Riba 31 di Mei lo tuma luga e apertura di e conferencia cu un anochi di Gala na beneficio di Rode Kruis Aruba. Ademas di ta e dia di inscripcion, durante e anochi aki Orkesta Sinfonico Hubenil Simon Bolivar hunto cu artistanan Tica Giel, Landa Henriquez y Angelique Janssen lo duna un bunita concierto pa recauda fondo pa Rode Kruis.

“E motibo pakico a scoge pa Rode Kruis e aña aki ta pasobra e ta simbolisa “Team Work”. Rode Kruis ta un instancia Internacional cu ta mara hopi pais cu otro. Rode Kruis ta un instancia cu no por funciona sin e cooperacion dim as cu un instancia y ta esun cu ta perfila na momento di catastrofe grandi. Pesey e escogencia.” Minister Schwengle ta sigui splica.

Hopi informacion ta wordo duna riba salubridad a base di polarisacion y ta e obhetividad ta wordo busca a traves di e Congreso. Falta educacion y dialogo y ta pa e motibo aki e expectativa ta hopi halto. Tur esunnan cu ta interesa pa participa na e congreso aki y kier mas informacion por bishita e website www.hcca.aw of manda un e-mail na info@hcca.aw.