Marisol Lopez a logra aumenta 743% den voto te 4191 voto personal

ORANJESTAD – E sorpresa di e eleccion aki sigur pa loke ta votos, ta Marisol Lopez Tromp. Den un tempo record, reviva un partido, logra un partido cu candidatonan basta desconoci, core un campaña practicamente sin placa y sin buya, e la sa di haya no menos cu 4191 voto su so, cu ta un aumento di 743% di e eleccion anterior unda cu el a haya ‘apenas’ 497 voto. Y si wak bek mas atras, el a ‘casi’ logra e cantidad di voto record di 2001 cu MEP ora cu el a yega 4709 voto. Cuater aña el a haya menos y a logra 4392 voto. Y asina el a sigui bay atras te yega 2017 cu su cantidad di voto mas abou. Hopi a mira esaki como e fin di Marisol tambe. Pero, cos a bolter positivamente pe, y su empeño (incomprendible pa hopi) pa sigui den politica, y usa e momentum crea aña pasa riba e tema di bringa corupcion, a scucha su siguidornan y e resultado awor ta conoci.