Benny Sevinger a logra ‘saca su mes’ aunke deteni den prison

ORANJESTAD – Cu un total di 1614 voto individual, Benny Sevinger a logra saca su mes riba lista di AVP como resultado di e eleccion aki. Mientras cu e la haya 43% menos voto cu den 2017 (2785), e hecho cu e tabata encarcela y ta un sospechoso di husticia, toch e la acumula un cantidad impresionante di voto. Esaki ta pone cu pa ley, e por drenta Parlamento y ta pasa den e prome 7 personanan riba e lista (conforme e cantidad di asiento cu e partido a haya). Esey ta nifica cu envez di Robert Candelaria cu ta na # 7, Sevinger lo mester haya e posicion aki. Durante un evento politico, Mike Eman a haci un yamada dramatico riba e comunidad latino y pueblo di Aruba pa vota pa Benny, y asina manda un señal pa Ministerio Publico. E señal a wordo capta, pero mes momento el a causa tambe (segun hopi) e perdida di por lo menos un asiento di e partido.