E biaha aki no tin e luho di tempo pa forma gobierno

ORANJESTAD – Contrario na 4 aña pasa ora cu formacion di gobierno a tuma 2 luna, parce cu e biaha aki esey no ta bay ta e caso. “(Nos) no tin (e) luho di tempo” lider di partido MEP, Evelyn a bisa na salida for di su bishita na Gobernador dialuna atardi. MEP tabata e prome partido cu a haya asiento den e eleccion aki, pa bishita gobernador. Segun Wever tempo no tin hopi, ya cu tin e.o. Hulanda ‘riba nos nek’, segun e lider di partido. Como tal mester traha liher pero bon pa keda cla cu formacion di un gobierno nobo.

PROBLEMA CU MARISOL

E mandatario a sigura noticiacla cu e no tin problema pa traha cu ex colega Marisol Lopez Tromp si e bira un partner den coalicion. Partido MAS (di Lopez) a haya 2 asiento pues ta un candidatop potencial. Pero como cu su salida di gobierno no tabata esun mas elegante, tin e pensamento cu tin herida habri entre nan dos. E mandatario a confirma cu cos no a bay bon, pero ora di traha, a traha bon cu otro. Tin cu wak con esaki ta bay desaroya si yega asina leu pa traha hunto. Mas e mandatario no a bisa riba e tema ey. 

TRAHA CU PARLAMENTO DI OTRO CONSTELACION

Loke por bira un problema, ta otro siman ora cu Parlamento nobo sinta oficialmente. Si tur cos ta bon, pa dia 9 di juli parlamento nobo mester sinta caba. Y esey ta nifica cu si no tin gobierno nobo forma ainda, cu e partidonan cu tin asiento y segun numeracion di lista, ta bay den Parlamento ‘tanten’. Esey ta nifica e ora p.e. cu e prome 9 candidatonan di MEP (ehempel cu Wever Croes a duna), tin cu bay den Parlamento. E problema ta cu e constelacion ta diferente di e gobierno na mando, cu ta ‘ainda’ MEP, POR y RED. Den paisnan grandi esaki a logra basta tempo, manera p.e. Hulanda. Pero na Aruba cos ta diferente y no ta sigur con largo esaki ta funciona. Y esaki tambe Wever a subraya.