Rainbow Warriors Core: Eleccion pa Staten di Aruba a ser teni den un forma ilegal

ORANJESTAD - E eleccion pa Staten di Aruba a ser teni den un forma ilegal. Asina e organisacion no gubernamental (NGO) Rainbow Warriors Core (RWC) ta alega dialuna den un comunicado. Segun e grupo aki,  uso di e QR codes pa autentica stemgerechtigden y verifica stemkaarten, no ta permiti pa ley, pasobra e uso di QR code no ta permiti, pasobra e ta implica e uso di equiponan digital den e stemlokaal cu ta acopla na y ta conecta cu un computer central den hoofdstembureau na Censo.

E uso di e QR  code scanning y  authentication software pa stemkaarten y su obvio integracion den un sistema di software cu ta alavez tabula y totalisa votonan deposita  no ta REGLA pa ley mediante adaptacion den Kiesverordening, ya cu e trayectoria pa cambio di e Kiesverordening lo a tuma un tempo hopi largo mes.

KIESVERORDENING

Nan ta sigui bisa cu den e Kiesverordening lo mester a specifica den un forma hopi detaya entre otro con tal sistema mester funciona, supervision di e uso di e sistema, checks and balances, y con e sistema aki ta ser incorpora den e procesonan di conteo y registro di votonan, tabulacion y totalisacion di voto cu SI ta stipula pa e Kiesverordening y muy en particular con e datonan registra via QR scanners ta pasa pa e sistema di conteo oficial di hoofdstembureau na Censo den un forma cu e datonan  cu ta pasa ta controlable, verifiable, y legitimo y cu e integracion di e datonan aki ta duna un resultado final verifiable,  controlable y legitimo pa loke ta resultado di eleccion.

ADAPTA PROVISION DI LEY

RWC ta haya tambe cu Gobierno di Aruba y Raad van Advies a haña cu ta suficiente pa solamente adapta e provision den ley cu ta stipula kico mester aparece imprimi riba stemkaart pa permiti uso di QR code scanners neglishando y ignorando e NECESARIO cambionan den Kiesverordening pa e actual procesonan digital y equiponan usa, cual ta encera den e uso di scanners y tabulacion y totalisacion, como "ondersteunende hardware en software voor verkiezingsprocessen" ta legalmente incorpora den e sistema usa na Censo. Pues e uso di e QR codes actualmente no ta someti na ningun REGLA ancra den ley pa loke ta concerni control, supervision y checks and balances requiri, cual ta crucial pa graba den un forma legitimo, verifiable y controlable  datonan den procesonan electoral segun RWC.  Fuera di esaki nan a tuma nota di multiple violacion di articulo 65 di e Kiesverordening, cual articulo ta establece e legitimo derecho di cualkier votador  y checkers en particular pa ta presente PADEN di e urnanan electoral, pa observa y hasta laga presidente di stemlokaal registra den procesverbaal violacionan detecta di reglamentonan pa votacion den urna electoral! Pasobra tawata tin violacion di articulo 65 na gran cantidad  di urna electoral, na unda tawata stroba presencia paden di urna di checkers y hasta a keda registra caso na unda checkers a ser NENGA pa ta paden y mester a haci nan trabao para PAFOR, un flagrante violacion di articulo 65, y cu esey un proceso basico pa un eleccion, esta monitoreo a ser restringi.

A consecuencia di e dos violacion constata,  esta uso di un proceso ilegal,  no reglamenta pa ley di QR code scanners,  y violacion sistemico di articulo 65, cual ta base pa checkers por opera PADEN di urna electoral, nos mester considera e eleccion teni  diabierna 25 juni ultimo, di acuerdo cu standard internacional pa "free, fair and transparent elections" RQWC ta considera esaki como un eleccion no legitimo.

Y consecuentemente nan ta haña cu a bira necesario pa formalmente pidi Ministerio Publico pa confisca tur stembiljet paketa y seya, correspondiendo na stembiljet cu voto valido, invalido y tur stembiljet no usa y obtene copia di tur procesverbaal y verslagen, promer cu e stembiljetnan ta ser destrui  unavez resultado final di eleccion ta keda certifica, manera stipula den articulon 87 di dicho Kiesverordening.

Segun RWC e proceso di confisca materialnan di evidencia ta pa por haci reconteo, no segun stipula pa Kiesverordening,  pero den contexto di un investigation penal, cu entre otro lo por enfoca riba "valsheid in geschrifte".

Fundacion Rainbow Warriors Core, registra cu UNITED NATIONS NGO Liaison Office na New York, como human rights organization, di acuerdo cu linea di maneho, reglanan y provision pa observadornan internacional pa eleccion, ta asumi e responsabilidad  den ausencia di observadornan oficialmente invita y accredita pa Gobierno di Aruba y den ausencia di organisacionan y prensa internacional specializa den cubri procesonan electoral 25 juni ultimo pa traha un rapport cu lo ser manda pa Tweede Kamer na Holanda, Comision Europeo, Parlamento Europeo, OSCE Office for Democratic Institutions and Human Rights, the Organisation of American States, the US Department of State, organismonan regional den America Latina y Caribe,  prensa internacional y organisacionan internacional di derechonan humano specializa den "election integrity".