Ta spera formador un tarea dificil pa forma un gobierno nobo

ORANJESTAD – Loke na prome instante ta parce un tarea facil, esta forma un gobierno nobo, ta hopi mas dificil cu hopi ta kere of pensa. Ta spera e formador di gobierno proximo un tarea dificil pa cu formacion di un proximo gabinete cu ta conta cu mayoria minimo di 11 asiento den Parlamento y un reparticion ‘husto di cartera di minister’ na nivel di gobierno. Ainda mester apunta un informador si, cu tin cu sondea e posibilidadnan. Pues lo dura un rato prome cu e formador ta den pantaya. Pero esey no ta haci e tarea menos dificil.  Na final di dia, mester forma un gobierno cu ta representa e cantidad di asiento, combina cu un programa di gobernacion cu ta cumpli cu exigencia y deseo di tur e partidonan en cuestion. E resultado di eleccion ta pone cu un coalicion ta e unico forma con pa yega na e mayoria minimo di 11 di e 21 asiento disponible. 

E POSIBILIDADNAN

Esun yama pa forma un gobierno nobo ta partido MEP. E no por haci esaki su so, cu ‘apenas’ 9 asiento. Pues e mester por lo menos un partido cu dos asiento pa logra esaki. Mirando e relacion fastioso cu tabatin cu e lider di un di e partidonan cu tin dos asiento (MAS), e posibilidad ey ta mustra dificil (pero no imposibel, mirando cu a forma te hasta cu enemigo Oduber na 2017). E otro alternativa mas logico ta pa forma cu partido RAIZ cu tambe tin 2 asiento. Pero e ora e ta un gobierno cu base minimo cu no ta sano pa tur e loke cu mester bay haci cu Hulanda. E ora por busca acercamento cu ACCION21 cu tin un asiento. Hunto nan tin 13 asiento. 

BLOKE

Pero, loke tambe por sosode ta cu e partidonan chikito ta forma un solo bloke (a reuni caba entre dos den fin di siman) cu ta pone nan exigencianan sino fono, cu por bira hopi fastioso. Lider di MEP a bisa e portal aki caba cu mester baha di e cabay ey y bin den un forma sensato. Si e bloke ey keda forma y no por logra cu MEP, tin ainda partido AVP cu ta bira e ‘alternativa’. Partido AVP no tin choice, sino di bay cu tur tres chikito, (minimo dos partido pa yega 11 asiento) ya cu asina so e tin un base amplio di 12. Y sin nada di esey sosode, lo mester bin un eleccion nobo. Ta spera cu no yega na e extremo ey.