RED ta bay reuni internamente pa delibera riba nan plannan di futuro

ORANJESTAD – Partido RED ta bay reuni internamente pa delibera riba nan plannan di futuro. Asina nan ta declara publicamente despues di e resultado di eleccion di diabierna ultimo. “ Pa Partido RED Democratico e resultado en general a mustra cu pueblo no kier gobierno absoluto mas” e declaracion ta sigui bisa. “ Esaki ta un di e idealnan di RED y pa es motibo ey nos ta contento. A duna e biaha aki oportunidad na 3 partido chikito y esey ta mustra cu pueblo kier algo diferente”. Pa e partido specifico nan ta bisa cu “dimes nos ta desapunta cu e hecho cu nos no a logra mantene nos asiento pero nos tawata realistico for di un principio”. Segun e lider, historia a mustra cu partido chikito no ta ripiti presencia den Parlamento y cu ela declara esaki den varios ocasion durante e añanan den Parlamento. “RED ta bai reuni pa delibera ariba nos plannan pa futuro. Nos ta respeta decision di pueblo y nos ta desea e gobierno y e Parlamento nobo exito cu e retonan nan dilanti y cu Papa Dios guia y conserva nos dushi isla” e declaracion ta finalisa bisando.