E partidonan politico ‘chikito’ a cuminsa papia cu otro caba

ORANJESTAD – E tres partidonan politico ‘chikito’ ACCION21, MAS a reuni cu otro diadomingo riba e resultado di eleccion y mas probable tambe con ta bay traha hunto. Potretnan riba e pagina di Facebook di Accion21 ta confirma e reunion. Lider di e partido ACCION21 Miguel Mansur a bisa diabierna anochi caba cu tabata su deseo pa e tres partidonan menciona, topa prome cu negosacionan oficial cuminsa. Mientras cu ta mira e lidernan di ACCION21 y MAS riba e potret, e informacion ta bisa cu tabata ‘wardando’ riba e lider di partido RAIZ,. Sr Ursell Arends. Sinembargo for di sr Arends, e portal aki a compronde cu e ta na rouw y cu su proximo cita ta cu gobernador e siman aki. Oficialmente esaki ta poni pa diamars mainta 10 ‘or y mei. Pues no ta confirma cu RAIZ tambe a forma parti di e reunion aki finalmente. 

FORMACION

Manera ta conoci, tur e tres partidonan aki a logra asiento pa por forma parti di e proximo Parlamento. Pregunta ta cua di nan ta forma un coalicion cu e partido cu a sali esun mas grandi esta partido MEP cu 9 asiento. Nan ta e prome pa forma un gobierno. Si nan no logra, ta bay e ora pa e di dos partido mas grandi cu ta AVP. Henter weekend tabatin speculacion ken lo a forma cu ken, y a pone varios posibilidad. Esun mas simple ta MEP-RAIZ cu 11 asiento hunto, sigui pa MEP-RAIZ-ACCION21 y uno cu esun grandi y tur tres chikito, aunke no ta mira esaki mucho probable. Esaki debi na e historia cu e lider di partido MAS tin cu partido MEP. 

REUNIONE reunionan oficial ta inicia dialuna cerca Gobernador. Lider di partido MEP ta reuni dialuna atardi sigui pa diamars mainta y atardi unda cu lo reuni cu e otro tres partidonan. Tin 2 reunion poni pa mainta y dos pa atardi. Dialuna mainta lo reuni prome cu CAFT y SER, y atardi cu MEP.