Aruba ta bay urna electoral awe pa eligi su proximo Parlamento!

ORANJESTAD – Awe Aruba ta bolbe bay urna electoral pa eligi su parlamentarionan nobo. Un derecho democratico cu no tur pais tin awendia, pa straño cu por zona. Un eleccion cu lo ta diferente, pa varios motibo. Entre nan, e prome eleccion den un pandemia, uno yama prome cu tempo, y esaki riba su mes a converti e eleccion aki den uno diferente. Uno unda cu e placa (supuestamente) no tabata disponible manera antes pa core campaña, limitacion impone pa motibo di e pandemia, cu ta trece otro cambio na e forma con nos ta hiba campaña tradicional. Na cas final di e campaña, a suavisa e medidanan di Covid19 cu a pone cu toch por a haci mucho mas cos cu inicialmente a frena debi na tur protocol. Asina mes tin ainda protocol cu lo evita cu partidonan por haci cosnan riba e dia di eleccion mes, manera parade y of aglomeracion. Un otro diferencia ta cu e eleccion aki lo conduci den un gobierno sea nobo of di continuacion, pero unda cu e diferencia ta cu e lo tin cu goberna a base di un acuerdo firma cu Hulanda cu ya ta stipula te den su detayenan specifico. Hopi libertadnan politico lo no tin mas, pa por goberna di e forma cu e partido of gobierno nobo ta antoha. Kico cu e motibo of situacion por ta, corda vota ya cu esaki ta bo derecho sagrado. Un derecho adkeri cu hopi pais no tin ainda, of a perde den transcurso di añanan. Cu sano huicio prevalence y cu e dia di awe resulta den un otro momento bunita democratico y cu diasabra nos tur por ta orguyoso di nos sistema electoral. Biba Aruba!.