‘Critica’ di Jandino riba Aruba y Corsou tin rednan social loco

ORANJESTAD – Un comentario of ‘critica’ e siman aki haci na un emisora di Corsou door di e comediante Jandino Asporaat no a cay den bon tera na Aruba. Un grabacion di e combersacion entre e comediante y e locutor en cuestion a aparece riba Facebook e siman aki di e intercambio entre e comediante y un locutora femenino cu a crea un discussion riba su mes y no tabata uno alegre. E comentario cu a cay den mal tera, ta e parti unda cu e comediante ta bisa cu Aruba su hendenan no conoce su cultura y a laga esaki bay perdi. Di otro banda e ta elogia e isla pa su servicio perfecto y cu na Corsou nan por siña di dje. Pero asina mes, e comentarionan en general no a cay den bon tera.

E COMENTARIO

Hopi ta bisa cu no ta pa Asporaat duna tipo di comentario asina y cu e mester keda keto riba e tema. Otronan cu a wak e cu otro bista, ta mustra cu Asporaat no a papia malo, sino mas bien ta e locutora tabata esun cu a haci mayor di e critica y cu esun cu ta fout ta e locutora y no e comediante. Asina mes, e comentario di Jandino a crea suficiente trafico riba rednan social diahuebs. Mientrastanto Jandino ta na Aruba awe y mayan pa e estreno di su pelicula nobo Bon Bini Judesca. Esey ta e personahe cu Asporaat a crea unda cu ta tipifica un yiu di Corsou di color cu casi no ta tolera nada di hende y tin un actitud basta negativo. Pero e forma con Asporaat ta trece dilanti, toch a pone cu hende ta hari y ta identifica e personahe y ta mira e parti humoristico den esaki.