Polis lo controla si ta cumpli cu ley seco entrante awe tardi!

ORANJESTAD – Relaciona cu e hecho cu entrante diahuebs atardi 6pm ley seco ta drenta na vigor, Cuerpo Policial a sigura cu nan lo ta hopi activo pa controla tur actividad politico awe diahuebs y tambe si ta cumpliendo cu e ley seco. Manera ta conoci, Gobierno mediante e decreto nacional di 18 di juni 2021 No.1, DWJZ/1389/21, a dicidi di declara vigente e asina yama Ley Seco, cuminsando awe diahuebs 24 di juni 2021 pa 6 or di atardi y terminando diasabra 26 di juni 2021 pa 6 or di mainta.

Durante vigencia di Ley Seco tur localidad cu tin permiso pa bende bebida alcoholico leve of fuerte mester ta cera, mientras cu ta prohibi pa bende, entrega of duna bebida alcoholico leve of fuerte cu ta den e localidadnan aki na publico, cu excepcion di e siguiente casonan: 

1.      Tiendanan cu ta bende otro mercancianan banda di bebida alcoholico leve of fuerte (p.e. supermercadonan) por keda habri, bou condicion cu no ta permiti pa bende, entrega of duna bebida alcoholico leve of fuerte cu ta den e tiendanan aki.

2.      Hotelnan y lugarnan di alohamento (logement) por keda habri, bou condicion cu no ta permiti pa bende, entrega of duna bebida alcoholico leve of fuerte si no ta huespednan no-residente di e hotel of lugar di alohamento.

3.      Restaurantnan cu ta bende bebida alcoholico leve of fuerte por keda habri, bou condicion cu e bebida alcoholico leve of fuerte den e restaurant no por ser bendi, entrega of duna, cu excepcion di restaurantnan den e edificio di Aeropuerto Internacional Reina Beatrix den e areanan unda bebida alcoholico leve of fuerte por ser bendi of entrega solamente na pasaheronan saliente of di transito 

4.      Refresquerianan cu ta bende bebida alcoholico leve por keda habri, bou condicion cu no ta permiti pa bende, entrega of duna e bebidanan alcoholico leve den e refresqueria.

En conexion cu esaki Minister di Husticia, Seguridad y Integracion mediante e Disposicion Ministerial di 18 di juni 2021, Nr. DWJZ No.1390/21, a prohibi tur tienda, localidad of lugar cu no ta rekeri un permiso pa bende bebida alcoholico leve, pa bende, entrega y/of duna cualkier bebida alcoholico durante e vigencia di Ley Seco.

Finalmente Minister di Husticia, Seguridad y Integracion mediante e Disposicion Ministerial di 18 di juni 2021, Nr. DWJZ No.1390-A/21, a prohibi uzo di instalacionnan di zonido riba 25 di juni 2021 di 6 or di mainta te 8 or di anochi den un straal di 50 meter di un stembureau, si ta pa haci anuncionan di cualkier forma relaciona cu eleccion of pa toca musica. 

Cuerpo Policial lo controla debidamente cumplimento di e medidanan menciona.