Prome biaha den historia por vota pa un candidato cu ta cera den prizon

ORANJESTAD – Pa prome biaha den historia na Aruba, tin un candidato riba un lista politico, cu ta participa den un eleccion parlamentario mientras cu e mes ta deteni den prizon. Diabierna awor, simpatisantenan di candidato number 29 di e lista berde, Benny Sevinger por vota pe, aunke cu e mes ta cera pa un caso penal, conoci como Avestruz. E intento siman pasa pa libera e candidato prome cu eleccion, no tabata exitoso, y como tal e lo pasa eleccion den prison y e mes mester vota tambe den prizon. 

VOTA PA BENNY

Durante un encuentro di e partido cu latinonan den fin di siman pasa, e lider di partido Mike Eman a haci un peticion dramatico riba esnan presente, pa vota masalmente pa e candidato aki, y cu e mes semper a vota pa e candidato aki, esta Benny Sevinger. E intencion ta pa asina manda un mensahe pa Ministerio Publico cu e loke ta tumando lugar ta incorecto.  

DETENI

Despues di varios luna di speculacion y anticipacion, Sevinger a keda deteni dia 26 di mei ultimo, y siman pasa diasabra su detencion a keda prolonga cu 60 dia. Esaki no ta nifica cu e lo mester keda full e 60 dianan deteni, pero ta mas probable cu e ta pasa e dia di eleccion tambe den detencion na KIA. Hunto cu ne por lo menos 10 persona a keda deteni tambe pero cu mientrastanto a recobra nan libertad temporal aunke a keda cu e status di sospechoso.