Mas claridad entre sindicato, aeropuerto y ANSA despues di reunion cu minister

ORANJESTAD – No por tin un fusion entre AAA y Ansa, mirando cu ANSA no por ta un entidad cu ganashi, manera palabracion cu a wordo haci cu ICAO. Esaki y mas asunto a keda aclarea awe merdia durante reunion entre sindicato STA, minister di Transporte Otmar Oduber, ATA y ANSA. Intencion di e reunionnan aki tabata pa elabora riba diferente puntonan di importancia pa ambos banda y tambe aclarea diferente duda y precupacionnan cu lo por tabatin di parti di representante di e trahadornan.

DOT

Tambe a bira conoci cu recientemente DOT (Departamento di Transporte di Merca) tabata na Aruba, netamente pa mira si ANSA ta un compania cu ta haci ganashi, si e ta paga dividendo na terceronan. E mandatario a bisa cu mester a duna DOT e siguranza cu esey no ta e caso y por lo tanto no por ubica ANSA bou di un compania manera AAA cu si ta gana placa y si ta paga dividendo.

Oduber a duna di conoce cu e empleadonan di ANSA tabata kier a expresa nan precupacionnan y riba cada un di nan a mustra riba e hecho cu no ta cuadra cu berdad. Minister ta spera cu a elimina e dudanan existente y a bisa cu a duna e garantia necesario cu ta kere cu ANSA lo ta sumamente exitoso.

NEGOSACION CAO

Un di e dudanan ta cu por ehempel aerolineanan lo ta rabia of cu nan no lo kier paga y hasta cu lo tin un situacion financiero dificil pa den futuro por tin un negociacion di CAO mirando cu e no ta un NV cu tey pa haci ganashi, mirando cu conforme reglanan di ICAO e no mag di tin ganashi. A pesar di esaki, Oduber a aclarea cu tin tur espacio dentro do e compania pa por negocia CAOnan y haci e reservanan necesario riba inversionnan cu tin cu tuma lugar.

Oduber a bisa tambe cu director di ANSA a mustra riba e hecho cu a pesar cu a spera cu e prome luna e pagonan no lo a drenta manera cu mester ta, e rate di pago tabata bastante positivo. Casi tur e companianan ta pagando, solamente esunnan cu ta bula pa Venezuela ta keda un problema y ya caba a reuni cu no solamente ANSA, sino tambe AAA, ATA y Departamento di Aviacion Civil pa atende cu e situacion aki

FUSION

Despues a continua cu e reunion di AAA durante cual tambe a bin dilanti e pregunta riba e posibilidad di fusion cu ANSA. Aki tambe STA a puntra riba e situacion actual di AAA ya cu tin un organogram nobo y kier sa si e ta bay wordo implementa berdaderamente y con leu nan ta pa e wordo ehecuta. Aki Director di AAA, James Fazio a duna un splicacion amplio.

Banda di esaki STA ta di opinion cu AAA ta draai hopi bon mes, cu nan ta haciendo hopi ganashi y nan ta contento di tende esey.

ATA Y STA

Pa lo cual ta trata ATA, Diego de Cuba a duna di conoce cu un di e precupacionnan di e empleadonan tabata riba un reunion tripartidario cu nan tabata sinti cu ta wordo neglisha, pero a bin un aclaracion di e directora durante e reunion caminda a pidi pa trece e puntonan di agenda y lo considera e reunion entre STA, gerencia y empleadonan.

Diego de Cuba tambe a indica cu nan sa cu e situacion di ATA ta uno hopi stabil mirando con e ta wordo maneha, e tin 4 aña di existencia y e ta kere cu e tin un futuro su dilanti.