Corte: Gobierno mester otorga un kiezersregister ‘adapta’ na partido AVP

ORANJESTAD – Minister di Asuntonan General Evelyn Wever Croes tin te diahuebs merdia 24 di juni 2021 pa entrega un copia  (riba papel so) di e kiesregister di Aruba cu ta contene solamente nomber y districto unda e votador mester vota. Asina Corte a dicta diaranson merdia den e caso cu partido politico AVP a entama contra e mandatario en cuestion. Mes momento Corte ta suspende e decision anterior di e minister, pa no otorga e kiesregister na partidonan politico. 

LIMITACION

Mientras cu Corte ta obliga gobierno pa otorga e kiesregister, ta bin hunto varios condicion, manera ta omete adres y otro informacion cu normalmente e kiesregister ta contene. Por lesa tambe cu mientras cu por otorga e kiesregister, no por haci esaki si den forma digital. 

PROTEHA E CIUDADANO

Corte a bay di acuerdo cu e pensamento di gobierno pa cu e proteccion di e privacidad di ciudadano. Door di otorga e kiesregister completo, esaki lo a trece den peliger e proteccion aki. Y ta netamente pa e motibo aki tin e kiesregister pa sigura eleccion transparente y husto. Particularmente Corte tin un problema pa permiti cu adres di e votador ta wordo duna, mirando cu durante e caso, e partido AVP a admiti cu ta e.o. pa por controla riba dia di eleccion, cua votador di AVP no a bin ainda pa vota y pa asina nan por wordo busca na cas pa ainda deposita nan voto. Algo asina pa Corte no ta possible. 

FAYO

Segun Corte,di otro banda gobierno a faya den argumenta pakico no por a usa un otro medida pa proteha e privacidad di e cuidadano envez di omete e articulo 10 completamente for di e kiesverordening. Laga un articulo integralmente afor di e ley, ta un paso hopi pisa cu gobierno mester tene cuidao cu ne ora di actua. Ta keda na e parlamentario pa haya e balansa via articulo 8 di e EVRM entre cuida e privacidad di e ciudadano y e cuida e transparencia di un eleccion y no gobierno.  

CONFORME

Den e caso, partido AVP a laga sa cu nan ta conforma si nan haya un kiesregister cu solamente e nomber di e votador y e districto unda cu e votador tin cu vota. Riba esaki durante e caso, gobierno no a opone y a bisa cu nan ta di acuerdo cu esaki. Basa riba esey, corte e ora a bay di acuerdo y a honra e peticion di e partido, aunke lagando e asina yama ‘volgnummer’ si afo, cu ta e number cu nan ta yama ora cu check bo nomber riba e lista.

REACCION PROME MINISTER

Den su reaccion breve, prome minister Evelyn Wever a mustra di ta contento cu e veredicto. “Ami ta satisfecho cu e veredicto. Mi ta contento cu hues a pone e derecho di privacidad di cuidadanonan central. Esey ta locual nos kier a logra tambe” e mandatario a bisa noticiacla. “ E informacion cu hues a permiti pa duna partido AVP ta minimo y no lo viola derecho di privacidad di ciudadanonan. Un bon veredicto” e mandatario a finalisa bisando. Por lesa e sentencia completo AKI.