Otro medio di comunicacion ta uza encuesta di noticiacla den contexto robez

ORANJESTAD – NoticiaCla y Doc Opleidingen a tuma nota cu e medio di comunicacion Solo di Pueblo a usa e resultadonan di encuesta di nos portal pa produci un noticia. Den principio, no tin problema cu esey y ta welcome e uso aki, contal cu uza e informacion den contexto corecto. Den su publicacion di e resultado di e encuesta, NoticiaCla y Doc Opleidingen a pone explicitamente (disclaimer) cu e resultadonan di nos encuesta, cu a wordo colecta exclusivamente di forma digital (internet), no por wordo considera como e opinion general di Aruba, pero cu e ta e resultado di e opinion di e lector di noticiacla cu a participa den e encuesta solamente. NoticiaCla y Doc Opleidingen ta lamenta cu su informacion a wordo malinterpreta y usa pa un insinuacion como sifuera NoticiaCla a indica cu su encuesta lo ta representativo pa poblacion di Aruba. 

CAUTELOSO 

NoticiaCla y Doc Opleidingen ta hopi cauteloso con pa interpreta su encuestanan, y ta wak e encuestanan meramente como ‘indicativo’ pa cu e lectornan di NoticiaCla, specificamente. E informacion por ta interesante, entre otro e indicacion con hende cu no a dicidi ainda ta pensa y ki tipo di factor por hunga un rol pa nan por yega na nan decision di vota.