Eventual kiebro di contract di hedging lo tin consecuencia financiero

ORANJESTAD – E contracto cu WEB a sera cu Valero riba e benta di fuel oil, den un asina yama ‘hedging contract’, por wordo kibra y adapta, pero ta casi sigur cu esaki lo no sosode. NoticiaCla.com pa medio di su fuentenan a compronde cu kibra e contracto, -mientras siendo un opcion legal-, no ta mucho probable pasobra e lo costa WEB (y pais Aruba) placa. Ora cu a acerca hendenan yega na e negoshacion, kico e chensnan ta, e contesta tabata ‘si, pero tin costo’. Cu otro palabra, kiebro di contract lo resulta den multa pisa pa WEB.

CONTROVERSIAL

Ora cu NoticiaCla.com a acerca hefenan den e compania di utilidad, a tende cu ‘no ta papia pa awor riba hedging’, pasobra e ta un topico hopi ‘hot’ y ‘controversial’. Como tal ta prefera no toca e tema aki. Ta wardando riba e investigacion cu ta tumando lugar aworaki dentro di WEB, pa despues bin afo cu un decision y contesta. Tabata e siman aki ainda cu prome minister Eman a bisa cu mester duna tur hende chens pa haci nan trabou, y pa e investigacion determina e siguiente paso. Y na su debido momento, lo bin afo y laga sa kico ta loke ta bira e siguiente paso.

PRESION POLITICO

Mientrastanto tin presion tambe di parti di oposicion, cu a recorda e minister encarga, Mike de Meza, cu su dos siman di tempo pa e rapport keda cla, a vence. Miembro di fraccion di MEP, Glenbert Croes a indica cu ‘pa loke ta trata e "hedging agreement" nos mester bisa cu esaki ta e acto mas cruel cu por a wordo cometi contra pueblo”. Segun Croes, posicion di MEP ta uno categorico :” no tin ningun hustificacion pa esaki keda vigente! A base di esaki nos kier instrui esnan responsabel pa anula esaki inmediatamente. Sin kita afor cu nos kier exigi pa baha”.

KICO TA HEDGING

Hedging ta ora cu un compania dicidi di sera un contracto pa compra di un producto, basa na un prijs estableci e momento ey. E ta sigura cu pa e periodo di e contracto, e producto mester wordo cumpra na e prijs ey, irrespecto e prijs ta den e periodo di e benta. Esaki ta sigura cu no tin cambio di tarifa pa e tercera parti y ta crea un tipo di stabilidad pa e consumidor. Den e caso aki, a opta pa sera contracto cu e refineria Valero pa compra di fuel oil na un tarifa fiho basa riba e tasa e momento ey. A sigura cu pa un periodo di dos aña, no por mishi cu e prijs ey, creando un 'stabilidad' di prijs pa e cumprado y consumidor. Pa mala suerte den e caso aki, e tarifa di e producto a baha mas abou cu e tarifa sigura pa e periodo di hedging, cu a pone cu aworaki e no ta cumbini e cumprado di e producto, ni e consumido. Ta un risico cu ta tuma, den afan pa tin un stabilidad di prijs. Y den e caso aki e situacion no a resulta positivo pa e cumprado, den e caso aki WEB.