Encuesta: Casi 73% di lectornan no kier Censo comparti e kiezersregister

ORANJESTAD – Casi 73% di lectornan di noticiacla cu a participa na e ultimo encuesta di Noticiacla/Doc Opleidingen, no kier pa Censo comparti e kiezersregister cu partidonan politico, mientras cu 12% ta bisa cu si comparti e informacion, e mester ta limita. Awe tardi Corte lo dicta sentencia den e caso sumario cu partido AVP a entama contra minister di Asuntonan General riba e tema. Casi 900 persona a participa den e encuesta entre lectornan di noticiacla. Prome minister Evelyn Wever Croes a informa na noticiacla diamars cu e lo respeta e sentencia di huez, ora cu esaki bira conoci. 

E ENCUESTA

Noticiacla y Doc Opleidingen a haci e encuesta pa saca afor kico e lectornan di e portal ta pensa riba e tema. Ademas a probecha pa sa como ultimo intento kico e patronchi di votamento lo ta pa e eleccion di diabierna proximo. Ora di wak e diferente gruponan di edad, e opinion no ta cambia hopi, aunkue e grupo di bou 45 aña ta parce di ta mas disponible pa comparti algun datos personal cu e grupo 45+. Esey ta similar na hende cu a indica cu nan lo vota pa un partido nobo, cu tambe ta disponible pa comparti algun informacion. 

PA KEN VOTA

Pa loke ta e aspecto politico, entre esnan cu a participa na e mesun encuesta aki, un cantidad di 50% a indica cu nan lo vota pa un di e partidonan grandi mientras cu 28% ta indica cu nan lo vota pa un di a partidonan nobo. Si ta wak e grupo di edad ariba 45 aña, nan tin poco mas preferencia pa e partidonan grandi (51%) , na unda e grupo bou 45 aña ta indica cu 41% cu nan lo vota pa partido grandi y 31% lo vota pa un partido nobo. Un cantidad di 19% di esnan cu a participa den e encuesta ta indica cu nan no sa ainda pa ken nan lo vota, cual ta 25% di esnan bou 45 aña y 16% di esnan di 45 bai ariba. Un total di  895 hende a participa di tur districto di Aruba y di tur edad. 

DISCLAIMER

Atrobe ta bon pa recorda cu e encuesta aki ta haci entre lectornan di noticiacla.com cu tin acceso na internet y cu pues a participa solamente den forma digital. Esaki ta nifica cu e no ta un refleccion di e populacion completo di Aruba. Y tampoco e ta un encuesta cientifico. E intencion ta pa haya sa kico e lectornan di e portal aki ta pensa, y e resultado ta wordo usa netamente pa motibonan noticioso. Pues, e portal aki no ta pretende cu esaki ta un resultado pa ilustra e pensamento di e isla completo.