Lider di AVP tabata un ‘no show’ den Democracia Cla riba NoticiaCla

ORANJESTAD – Loke mester a bira e di 11 edicion di Democracia Cla riba NoticiaCla cu un lider politico, lamentablemente (atrobe) no a tuma lugar dialuna anochi. Lamentable, pasobra e invitado di turno, lider di partido AVP Mike Eman no a aparece. Ta bisa atrobe, debi cu 4 aña pasa tambe, e mesun lider a opta pa no presenta den e programa. E biaha aki, sinembargo e situacion tabata pior ya cu e biaha aki a confirma no un biaha sino varios biaha, incluso e mesun mainta pa despues atardi keda sin aparece. Cu esaki, e ta bira (atrobe) e unico lider politico cu a keda sin presenta den e programa. 

MOTIBO

E motibo duna tabata varia entre, ’a bruha di dia’ siendo cu e mesun mainta, a haya confirmacion di e persona cu nan tabatine ‘poni pa awe’(esta dialuna atardi pa graba), pa ‘tin falta di manpower’, esta falta di personal pa aparentemente maneha e schedule di e lider di e partido berde y ‘mi a compronde fout’. Ora cu a recorda e persona atardi cu a confirma mainta, e la bisa ‘si corecto’.  Pa colmo a yama un ora despues di e orario cu mester a cuminsa graba e programa. Despues a mira cu e lider politico a opta pa bay den un programa cu un otro periodista pa 8’or di anochi. Por crea e percepcion cu esaki por tabata algo ‘planea’ pa no bin, pa asina no strobe e transmission di e programa di 8’or. Pero esaki ta speculacion pero ta hopi coincidencia si. 

REACCION

Loke a sosode e ora ta cu a habri e programa pa 8’or y mei, manera planea, pero pa informa e usuarionan di Noticiacla cu lamentablemente sr Mike Eman no a presenta, (pa di dos biaha), y e motibonan cu a wordo duna. A opta pa haci esey, esta habri e programa toch, como respet pa e usuarionan cu tabata en espera (e programa a wordo anuncia un anochi prome ). Si a laga esaki bay sin mas, lo tabata un falta di respet pa esnan cu si tabata pendiente di e programa, pa a laga nan den bashi, sin sa kico a pasa. Mes momento a duna respet tambe na e casnan comercial cu si ta cu nos y cu merece nan atencion tambe. PA DI DOS BIAHAPor nota cu a bisa varios biaha den e reportahe aki ‘pa di dos biaha’. Esaki ta pasobra 4 aña pasa, tambe e lider di e partido berde a keda invita, e biaha ey como ultimo  invitado como respet na e hecho cu e tabata e persona cu tabata goberna y tabata premier di e isla. Y como tal, e persona ey ta haya e ultimo programa. Pero e biaha ey, a confirma, y no a aparece nunca. Te cu awe, ainda no a haya sa pakico e biaha ey e no a aparece. E biaha aki, si kiera a duna un excusa aunke uno cu ta crea mas duda, pero por lo menos a bisa algo. No ta na altura pakico e lider ta opta pa haci esaki. No obstante su ausencia, Noticiacla ta desea tanto e partido berde como su lider Mike Eman tur clase di exito riba dia di e eleccion, y ta spera cu nan logra nan meta cu nan a pone pa e eleccion aki. Na nos  usuarionan, un biaha mas, un despensa. AWE NOCHI

AWE NOCHI

Awe nochi Democracia Cla riba Noticiacla ta termina su serie di 12 programa, cu e lider di partido MEP, Evelyn Croes, cu a confirma dialuna  di lo ta presente awe. Pues awe nochi 8:30pm, nos lo tin e lider di e partido MEP den nos ultimo session. Danki di antemano pa bo atencion y sintonia pa tur 12 programa cu a y ta pasando!.