Corte ta dicidi diaranson si partidonan politico ta haya e kiezersregister of no

ORANJESTAD – Diaranson awor 23 di juni despues di merdia Corte lo dicidi si e asina yama kiezersregister por wordo duna na partidonan politico dia di eleccion awor. Dialuna mainta Corte a trata e caso sumario cu partido AVP a entama contra Minister di Asuntonan General pa forza huez duna partidonan politico e documento aki. Esaki pasobra Gobierno a dicidi e biaha aki cu pa motibo di privacidad, no ta bay otorga e documento akin na partidonan politico. Tin por lo menos 4 partido cu tambe ta participando na e eleccion pero cu no ta forma parti di e caso, pero cu si ta sostene e lucha aki di e partido berde. No ta conoci pakico nan no a participa na e caso tambe.

AVP

Segun abogado pa partido AVP den e caso, esta mr Johan Sjiem Fat,  lider di partido AVP Mike Eman, ta un tradicion di 70 aña cu gobierno awor kier kibra pa asina duna chens na fraude electoral tuma lugar. Sr Eman ta mustra cu e unico intencion pa bringa pa e documento, ta pa e asina yama ‘checkers’, esta esnan di partidonan politico controla si enberdad e persona cu a vota, ta esun cu a presenta. Si no tin esaki, no tin e transparencia y e ora e grupo apunta pa prome minister ta esun cu ta dicidi si e persona cu a yega, por vota of no. Nan a sigura cu nan no ta interesa pa haya sa unda ken ta biba etc. Y ta un otro forma pa comete fraude electoral, despues cu a purba bin cu e scanner electoral cu no ta sigui mas debi cu a para e proceso aki (pa motibonan cu pandemia ta di tal forma cu e medida ey no ta necesario mas). Awor cu no tin scanner mas, kier purba di otro forma pa interveni den e resultado di eleccion y causa fraude segun Eman. 

CONSEHO ELECTORAL

Segun director di Censo cu ta conseha CE, mr Sharine Luydens, e proceso di entrega e documento en cuestion, ta pa anticua y no aplicabel mas. E ta data di temponan cu no tabatin forma corecto di identificacion y mester a sigura si e persona cu presenta, realmente ta e persona en cuestion. Segun mr Luydens, awendia tin suficiente mechanismo pa eherce e control di e identidad di e persona, di tal forma cu no por falsifica esaki. Como tal no mester di e tipo di control ey mas. Ademas, tin informacion cu partidonan politico lo tabata usa e documentonan aki pa identifica votadornan individualmente y busca nan na nan cas pa ainda eherce nan voto. Of tabata menasa votadornan cu a priminti di vota pa tal partido pero no a haci esaki mas. E punto ta cu segun CE, e proceso actual ta suficientemente sigura cu a conseha gobierno pa no otorga e documento aki, protegiendo asina e identidad di e ciudadano. Corte ta dicta diaranson awor si ta otorga e documento aki of no.