Encuesta politico: Interes pa partidonan politico ‘chikito’ a resalta

ORANJESTAD – Segun e ultimo encuesta di Noticiacla y Doc Opleiding, partido MEP a resulta e partido mas grandi den tur grupo di edad y tur bario. Ademas e lider di e partido a gana e debate tambe. Interesante ta pa nota cu varios partido nobo ta den porcentahenan cu lo por ta indicacion cu nan lo pasa e porcentahe necesario pa cu pasa e asina yama kiesdrempel: Entre nan ta tin e partidonan Accion21, RAIZ y MAS. 

DIRECCION DI VOTO

Entre e preguntanan den e encuesta, a puntra e grupo di 8% cu no sa ainda kiko nan lo vota, den ki direccion nan (esnan cu a participa) ta considerando pa vota, esta partido grandi, partido chikito of partido nobo. Aki un 54% di esnan cu a participa, a indica cu pa un partido grandi sigur cu no nan lo vota, y cero persona a indica cu nan ta casi sigur cu nan lo vota un partido grandi. 

MAS INTERES PA PARTIDO CHIKITO

Tambe e resultado ta mustra cu esnan cu a participa den e encuesta tabatin mas interes pa e partidonan chikito. Entre nan,  25% ta indica nan lo no vota pa nan, pero toch tin 19% di persona cu ta indica cu nan lo ta casi sigur eynan nan voto ta bai. Di e partidonan nobo, e grupo di 27% cu no sa ainda pa ken nan vota, esta e parti di ‘mi no sa ainda’  lo ta seriamente considerando di vota pa un partido nobo. Ora di indica ki partidonan e gruponan aki ta considerando, tin basta partido cu no ta wordo considera door di un percentaje halto. 

DISCLAIMER

E encuestanan cu ta keda publica riba e.o. Noticiacla,   ta habri pa tur simpatisante di tur partido. E idea ta cu hopi di nos poblacion ta interesa pa haña un idea kico nos poblacion ta pensando. Y ta aki e encuestanan di NoticiaCla ta purba di duna un bista mas imparcial posibel. Manera ta alerta semper, no tin control adelante ken ta yena e encuestanan. NoticiaCla no ta pretende di tin un encuesta representante di poblacion en general, pero e ta duna indicacion con e respondente ta pensa, y ken nan ta mas of menos (tipo di respondente). NoticiaCla semer ta encurasha tur su lectornan cu por ta di tur partido pa participa pa contribui na e encuesta.