Kock: No tabatin motibo pa ‘wraak’ e huez cu a prolonga detencion di Sevinger

ORANJESTAD – E pensamento cu a surgi den comunidad diasabra cu lo mester a cambia e huez comisario diasabra ultimo cu a dicta riba e prolongacion di detencion di parlamentario Benny Sevinger, no ta wordo comparti pa e abogado di e Parlamentario. Ora cu un abogado sinti cu e huez en cuestion no ta imparcial y of tin conflicto di interes pa cu su caso, e por protesta y haci un apelacion pa cambia e huez (wraak). E comentarionan cu a surgi, ta cu ta cuestiona e huez su relacion di trabou den pasado cu prome minister actual y cu esaki por hacie parcial. Pero segun e abogado, esaki no ta un hecho den e caso aki. 

CAMBIA HUEZ

Aunke cu e ta un medio disponible, e acto pa 'wraak' un huez e no ta algo cu ta wordo usa hopi. Den e casoi aki specifico pues, hopi a cuestiona e hecho cu e huez en cuestion su ‘pasado laboral’ y mas reciente su nombracion como huez a pone e grupo di persona pensa cu dificilmente e huez aki por ta parcial. Pa loke ta e pasado laboral, ta referi na e hecho cu e lo tabata colega di trabou un tempo cu e awor prome minister tempo cu e mandatario tabata traha na oficina di impuesto, y mas recien awor ora cu el a wordo selecta pa e gabinete aki y huramenta tambe como huez, tin hopi ta pensa esaki. Abogado di e parlamentario sinembargo tin otro pensamento. “No, ami no ta wak ningun motibo pa duda di e imparcialidad di e huez”, abogado Kock di DKLegal a bisa noticiacla dialuna mainta. “Cu mi no ta eens cu ne ta algo otro” e abogado a sigui bisa. Pues esaki ta pone cu no tabata necesario pa ‘cambia’ e huez e ora. E huez diasabra a prolonga e detencion di e Parlamentario y a rechasa e peticion di suspension di e detencion algun rato despues tambe. Esaki ta nifica cu e Parlamentario ta keda deteni te despues di eleccion actual.