Aruba ta drenta den e siman di eleccion Parlamentario

ORANJESTAD – Aruba ta drenta den e siman di eleccion parlamentario unda cu diabierna awor dia 25 di juni 2021. E fin di siman aki tabata e ultimo prome cu eleccion, y a sinti e ‘ambiente’ hopi. Algun districto esaki tabata mas notable cu otro, unda cu partidonan a usa cierto areanan pa enfoca nan mes (p.e. MEP na Santa Cruz y AVP na Bushiri) pa profila nan mes, mientras cu e partidonan menos tradicional a opta pa campaña den barionan, sin mucho ‘buya’. 

ASISTENCIA POLICIAL

Notable tabata cu na algun occasion, polis mester a acudi pa resolve sea ta e situacion di trafico cu a surgi, y of un of otro confrontacion entre e dos partidonan grandi. Na tur, e fin di siman a bay basta ocupa, y no a raporta nada grave cu a rekeri atencion grandi. 

PARADA POLITICO 

Parada oficial no tabatin cu tabata tradicion pa partidonan ‘midi’ nan forza, pero tabatin varios caminda cu serie di auto di cu bandera di mesun partido tabata core. Oficialmente polis ta considera un parade, ora cu 10 auto core tras di otro pa ‘e mesun proposito’. 

E SIMAN AKI

E siman aki ta e ultimo siman di campaña pa e eleccion di diabierna proximo, unda cu partidonan lo haci todo por todo pa ainda convence e ultimo hendenan cu ainda falta pa wordo convenci pa vota. E grupo di indeciso ainda ta wordo considera como relativamente grandi (14%) y nan mester wordo convenci prome cu diabierna ainda. Oficialmente a compronde cu partidonan por activamente propaganda via e medionan tradicional (tv y radio) te cu 2 di prome cu e eleccion. Ademas e ultimo dia pa tene actividanan politico publico ta diaranson awor. Di otro banda, e regla di avisonan politico no ta regla pa ley pa pasa riba internet. Pues aki ta unda cu partidonan politico lo ‘probecha’ y usa e medionan aki pa por yega na e comunidad. Pa loke ta bishita na cas, esaki lo sigui sigur te na ultimo.