Bermudez y van Zwol na Hulanda no a logra haya otro atrobe

DEN HAAG – E combersacion entre minister di finanza di Aruba Angel Bermudez y e top ambtenaar hulandes Richard van Zwol no a desemboca den un acuerdo diabierna ultimo na Hulanda. Esei kier men, cu ainda Aruba y Hulanda no por haya otro riba e topico di finanzas publico di nos isla. NoticiaCla.com mas tempran awe a raporta cu nan a topa otro durante e ‘pitstop’ di Bermudez, pa su biahe pa Paris.

INTENCION

E intencion tabata pa e encuentro aki bira un continuacion di e reunion cu a tuma lugar na Aruba recientemente. Na tal occasion tambe, Bermudez y van Zwol no a haya otro y a palabra cu lo purba un biaha mas ora cu Bermudez biaha pa Europa, -mas specifico Paris-, pa un reunion di trabou. E problema, segun NoticiaCla.com por a compronde, ta cu Hulanda kier papia riba contenido di e acuerdo financiero, pero Aruba ta prefera papia riba con Hulanda ta bringando Aruba, y kier mas bien impone riba nos isla. Pues, nan ta papiando ‘banda di otro’. E reunionnan no obstante esey, ta bay semper den un ambiente trankil y cortes.

RELACION BON

De hecho, a compronde cu e relacion entre van Zwol y Bermudez ta uno hopi bon, y tambe cu colega minister plenipotenciario Alfonso Boekhoudt. Tin un confiansa bon entre nan, y de hecho esaki ta e motibo cu ainda tin combersacionnan andando debi na e relacion di confiansa aki. Mas aleuw, si no ta pa Bermudez y Boekhoudt, tin indicacion cu e combersacionnan lo a pega masha tempo y cu e resultado por tabata mas pio cu awor. Pa aworaki, Hulanda ta sinta warda kico ta sosode cu e presupuesto di pais Aruba, y con gobierno ta y lo sigui yena e ‘recomendacionnan di CFT’ den dje. Y despues di esey, lo nan tuma nan siguiente decision.

FIANZA NOBO

Mes momento, e holoshi pa sera acuerdo di fiansa nobo, ta yegando unda cu Aruba tin cu bay fia placa den exterior atrobe (180 miyon) pa cumpli cu e debernan financiero. Aruba a laga sa caba cu nan no necesariamente mester di Hulanda y tin mas opcion pa por fia placa, enves di haci esaki cu ayudo di Hulanda. NoticiaCla.com a compronde cu tur e tempo, Hulanda tin e fecha di 6 di maart na bista, unda cu , aunke prematuro, ta papiando di un posibel AMvRB, pa asina forza Aruba cumpli cu su debernan di drecha e situacion financiero.