Xander Bogaerts ta sigui prome den voto pa All Star Team di Major League Baseball

BOSTON – Tur cos ta mustra cu e aña aki Aruba su pelotero professional Xander Bogaerts lo ta den e seleccion di American League durante e ‘Weganan di Strea’, osea e All Star Game. Manera ta conoci, pa un hungador forma parti di e seleccion, e mester sigui un proceso di voto. Y te cu 4 dia pasa, Xander Bogaerts tabata na prome lugar cu 31% di voto, riba Bo Bichette di Toronto cu tabatin 15%, sigui pa Tim Anderson cu tabatin 11%. Bogaerts no ta nobo pa e All Star team ya cu na dos ocacion el a logra forma parti di dje y na 2016 a te hasta habri e wega, esta figura den e alineacion inicial pa e seleccion e aña ey. 

E VOTAMENTO

Dialuna ultimo Major League Baseball a prove e prome standing di e conteo desde cu e prome fase di votamento a inicia dia 3 di juni ultimo, revelando e top 10 den cada posicion. E top 3 ta avansa pa e di dos fase. E final di e prome fase lo keda anuncia diadomingo 27 di juni proximo. E di dos fase lo dura 4 dia y termina diahuebs 1 di juli proximo y lo anuncia e hungadornan mas laat e dia ey. Ey lo confirma e posicion di Bogaerts.  E wega mes lo tuma lugar den Coors Field na Denver, Colorado. Pa bo vota pa Xander Bogaerts, click AKI.