Debate di KvK a conoce intercambio fuerte entre lider di AVP y MEP

ORANJESTAD – Loke hopi a spera, a sosode diahuebs anochi durante e ultimo debate politico di Camara di Comercio, aunke no den e forma cu e la bay. Esta un 'intercambio entre lider d MEP y AVP. Esaki a sosode berdad, pero e forma con esaki a bira, a pone cu e moderador mester a cay aden pa 'remedia e situacion'. Tabata casi na final di e debate ora cu e lidernan politico di AVP y MEP mester a topa cara cara y contesta un pregunta specifico, cu cos a bira un poco ‘cayente’ cu a pone cu e moderador mester a cay aden pa ‘suavisa’ e situacion. E pregunta tabata riba corupcion y con e partidonan mester atende cu esaki. Mientras cu por considera esaki e momento mas ‘cayente’ di e debate, e resultado di loke a pasa, tin hende papiando. Esta si loke a sosode, tabata corecto of no. 

E PREGUNTA

E pregunta specifico tabata si e partidonan (MEP y AVP) ta di acuerdo cu integridad den gobernacion ta nifica cu un persona mester wordo gescreened prome cu e subi un lista politico y si un parlamentario of minister bira sospechoso den un caso penal, nan mester wordo suspendi automaticamente wardando e resultado di e investigacion. E prome reaccion tabata di lider di AVP sr Mike Eman cu a indica cu e pregunta no tabata uno neutral.” E pregunta parce hopi neutral. Mescos cu e votacion digital di awe nochi”. E votacion riba e prestacion di lidernan, tabata na fabor di lider di MEP. Despues el a sigui pa contesta e pregunta den su forma. Y a sigui e contesta dii e lider di partido MEP. A sigui e contesta di 30 seconde di e lider di AVP. Ta ora cu lider di MEP a bay contesta den su 30 seconde di tempo, cu e lider di AVP a cuminsa interumpi, causando iritacion di parti di e lider di MEP. Aki e moderador a cay aden y duna e lider di partido MEP atrobe 30 seconde. Pero aki atrobe e lider di AVP a cuminsa interumpi cu a pone e lider di MEP irita mas y a comenta finalmente ‘sr Eman, bo por grow up please’?  Asina mes e lider di partido AVP a keda papia. Dado momento e moderador a bolbe cay aden y bisa cu e ta tuma e asunto den su man, indicando cu e ta desvia di regla y a dicidi di duna cada lider 30 seconde atrobe, bou di condicion cu no ta interumpi otro. Y e biaha aki, ambos por a contesta nan contesta sin interupcion. E interaccion aki por ta, mientras no e forma mas corecto, tabata e momento mas ‘bibo’ di e anochi. Lider di AVP a te hasta remarca durante di e intercambio di palabra, cu ‘ta esaki ta un debate’. 

MUCHO CANDIDATO

E debate mes a conoce cambionan despues di e prome ‘session’ 2 siman pasa. A cambia moderador (a bira Mark Benson Denz), e setting y session di pregunta. Tur despues di a analisa e formato anterior y procesa varios comentario y critica cu tabatin pa cu e formato prome. E problema original tabata cu ora cu tin 12 partido y 12 lider, ta hopi dificil y casi imposibel pa tin un ‘debate’ real pasobra no tin espacio suficiente y tempo pa e candidatonan por ‘debati cu otro’. Como tal mester a busca un formula pa ainda por tin 12 lider riba un scenario, haci yen di pregunta y percura pa tin chens igual pa tur lider, sin tuma parti pa niun, mirando cu esaki por bira un problema di imparcialidad.