Minister sorpendi cu Lotto ta culpa gobierno cu tin menos inversion den deporte

ORANJESTAD – “Ta hopi peculiar pa netamente esnan cu tin deporte sangrando, esnan cu tin e fondonan pa yuda deporte kier busca otro pa culpa siendo cu nan ta esnan responsabel pa e negligencia den deporte”. Asina actual minister di deporte encarga cu Lotto Dangui Oduber a reacciona diaranson riba e articulo di Lotto (riba e.o. noticiacla). Segun Oduber, no por ta asina cu ora Lotto ta bende 60 miyon florin, deporte ta haya 4 miyon florin y e ganashi di 11 miyon florin ta bai Canada! “Esaki simplemente ta un abuso” e mandatario a bisa. 

NO POR KERE

“Ora ma lesa e articulo aki mi no por a kere loke ta para den dje” e mandatario a sigui bisa. Segun Oduber, ta un grupo di activista di AVP cu a secuestra Lotto, masacra deporte, laga deporte sufri, keda sin inverti awe kier culpa gobierno. “ E director actual tawata consehero di ex minister Schwengle di AVP cu a wordo poni eynan sin vacature, sin sollicitatie pa tin un salario di 15.000 florin pa luna mientras deporte no ta haya su fair share. Un voto pa AVP ta un voto pa sigui castiga deporte y keda sin duna fondo pa inverti den deporte” Oduber a continua bisando. “Awor cu den aña 2020 segun Lotto cu nan a bende menos nan no kier cumpli cu e acuerdo pa duna SSA e fondonan segun contract. Tempo nan a strika mas di 60 miyon florin na benta si nunca nan a pensa pa duna deporte mas pero awor cu a bende menos kier duna deporte menos”. E mandatario ta sigui bisa cu Lotto a hiba un maneho financiero desastroso cu dia di awe pa anjas no por presenta cuentanan annual y responsabilisa nan mes pa e deroche di placa di deporte.