Phillips mester ilumina interior edificionan di gobierno

ORANJESTAD – Gobierno di Aruba kier uza e compania Phillips pa percura pa entre otro iluminacion interior di edificionan di gobierno y sitionan iconico. Philips a haci un sondeo profundo di e situacion di iluminacion den edificionan di gobierno y con pa haci e uzo di coriente mas eficiente. Gobierno a reuni cu e compania siman pasa pa wak con lew por yega cu esaki. Minister de Meza a splica cu “e compania multinacional a presenta su plannan pa e proceso completo pa “retrofit” edificionan di gobierno y baha uzo di coriente pa iluminacion”. Retrofit ta encera inversionnan pa mehora eficiencia di edificionan y casnan. Pa loke ta trata e sitionan iconico, den e caso aki specificamente a combersa tocante e “Welcome Plaza” na waf di Oranjestad y “Plaza Padu”. E ultimo plaza ta forma parti integral di e revitalisacion di Oranjestad y ta keda patras di Bestuurskantoor entre monumentonan historico di nos capital.

Philips ta bay introduci tecnologianan eficiente pa e edificionan di gobierno cu ta resulta den reduccion significante di gastonan di coriente. “Den teoria loke gobierno por spaar na uzo di coriente den su mesun edificionan por facilmente financia e iluminacion di e proyectonan di e dos sitionan iconico menciona anteriormente,” Minister Mike de Meza a splica. Philips su mision ta pa mehora bida di e ser humano pa medio di innovacionnan significante y esaki nan ta refleha den e Memorandum of Innovation cu e proyectonan en cuestion.