- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
Evitando un caso, Ministerio Publico a kita limitacion riba Parlamentario Sevinger na KIA
SANTA PATIA – Un dia prome e caso contra Ministerio Publico mester a tuma lugar cu cu abogado di parlamentario deteni Benny Sevinger a entama, OM a kita algun limitacion serio cu tabata impone riba su cliente. Y mayan e otro limitacionan lo keda elimina. Pues no tabata necesario mas pa e caso ey tuma lugar. Awor ta pendiente pa e siguiente parti unda cu ta wak si ta libera su cliente otro siman (ora cu e 16 dia di detencion termina) of si e ta keda prolonga un biaha mas. E ora posiblemente lo bringa esaki tambe.
LIMITACION
“ Nos a cuminsa un caso contra su beperkingen. E lo mester a tuma lugar awemerdia. Su situacion ta cu e no tin acceso na literatura, TV, Radio, e mester ta den afzondering (dus geen contact cu otro presonan) no ta haya bishita, no telefonisch contact cu su famia” e abogado a bisa noticiacla diamars. “Nos a haya cu no tabatin base pa abstene di literatura den KIA (bibliotheek) ya cu esey no por influencia e caso. E otro beperkingen tambe ta exagera den nos opinion, mirando cuanto tempo caba Ministerio Publico a haci investigacion” e abogado a sigui bisa. “Ayera Ministerio Publico -pa evita e caso- a kita prome beperking y el a haya acceso pa e bibliotheek. Mayan merdia nan ta kita tur otro beperkingen, dus su situacion lo bira mayan mas normaal” su abogado mr Kock a finalisa bisando.
DETENCION
Sr Sevinger ta e unico persona cu ainda ta deteni den e caso Avestruz cu ta trata investigacion riba otorgamento illegal di tereno di gobierno entre 2009 y 2017. Pa e investigacion cu a inicia na 2019, a haci 2 aña di investigacion y diripiente dos luna pasa a cuminsa detene varios persona den e caso aki. Mientrastanto tur (cu excepcion di sr Sevinger) a haya nan libertad temporal. Temporal pasobra tur ta keda sospechoso te ora cu e caso bin dilanti y huez determina e destino a base di prueba y defensa presenta pa tanto ministerio publico como e respectivo sospechosonan. Ta considera sr Sevinger e sospechoso principal, y e motibo pa tanto atencion asina ta e hecho cu e tabata un ex minister y actualmente ainda ta un parlamentario den funcion, cu ta activamente participando riba un lista politico den eleccion parlamentario otro siman. Tin posibilidad cu e parlamentario por ta deteni riba e fecha di e eleccion pa cual e lo tin cu vota den KIA mes. E abogado no ta kere cu e lo yega asina leu si.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
