Presidente di Conseho Electoral ta splica varios tema di eleccion
ORANJESTAD – E siman aki pa medio di un comunicado, e presidente di Conseho Electoral Glenn Thode a splica riba varios tema di eleccion cu ta importante. Entre nan, e carchi nobo di vota, e sugerencia di orario, e registro di votado y mas.
CARCHI DI VOTO
Segun Thode, riba e carchi di voto cu tur persona cu derecho di voto lo mester a ricibi awe caba, e biaha aki lo tin un QR code. E QR code aki ta pa yuda e eficiencia di e proceso di registra un persona cu a presenta pa vota. Esaki normalmente ta sosode na man den e Registro di votado di cada urna. Despues di e proceso di identificacion y registracion, un votado ta haya e stembiljet for di e Presidente di Urna, cu mescos cu semper ta blanco y no tin di ningun forma un conneccion cu e identidad di e votado. E votado ta bay cu e stembiljet den e hoki y ta marca cu e potlood cora e candidato cu e kier duna su voto, y despues ta dobla su stembiljet y deposita esaki den e buzon.
SUGERENCIA DI ORARIO
Debi na Covid-19 y pa evita aglomeraccion, preparacionnan a wordo haci di antemano. Pa e motibo aki riba e carchi di voto e biaha aki tambe tin un orario cu ta wordo sugeri pa yega na e urna electoral. Ora mayoria di persona acudi na e urna riba e ora di sugerencia, lo por evita cu tin aglomeracion durante e dia di eleccion na e urnanan. Esaki ta importante pa evita contagio di coronavirus. Tene bon cuenta cu esaki ta un sugerencia y NO un obligacion. Si no ta posibel pa e votado yega na e urna na e ora sugeri, por acudi na urna libremente entre 8'or di mainta y 7'or di anochi. Si tin diferente persona cu ta biba hunto cu orario diferente, ta recomenda pa yega hunto riba e ora di sugerencia di e persona cu ta mas conviniente pa esnan cu ta biba hunto.
REGISTRO DI VOTADO
Decision a wordo tuma cu no lo duna e partidonan politico copia di e registro di votado cu tur informacion personal y sensitivo di 70281 votado. E rason tras di e decision aki ta, cu ademas cu e no ta necesario pa e control cu lo mester a sosode antes ora technologia di identificacion no tabata tan avansa y e partidonan tabata tin un control social den bario, cu Pedro no ta Pablo, e registro aki ta contene informacion personal sensitivo di 70281 votado, cu ta ser acumula pa e servicio di Censo di pais Aruba. Pa un bon organisacion di nos eleccion, control di identidad di e votado cu ta yega urna electoral, y uso di e derecho di voto solamente un biaha, no tin necesidad di sosten di checkers manera antes. Uso di identificacionnan moderno y uso di Registronan electronico moderno y technologia certifica y avansa ta garantisa e proceso confiabel di eleccion y ta percura pa esaki, y ta den man di e Presidente y miembronan di urna.
Ora comparti e informacion personal aki cu un partido politico, ta perde di bista kiko exactamente ta e forma y limite di uso di e data sensitivo aki. Uso inapropia y contra nos derecho constitucional di voto liber, por ehempel busca un hende na su cas cu no a yega urna ainda, pa esnan cu haya e data aki den nan man ta sumamente facil. Uso y analysis di e informacion personal mas sofistica cu esaki tambe lo ta posibel. E derecho di proteccion di data personal ta un derecho fundamental di sernan humano cu te cu aña 2017 no tabata tin proteccion di derecho internacional y legal mes fuerte cu awe. Ta responsabilidad moral di Gobierno di Aruba, di Conseho Electoral y di Censo pa minimalisa entrega di data personal di e populacion na tercera partidonan si esaki no ta necesario pa buena marcha di un proceso y den esaki pa e proceso electoral. Traspaso di e data no ta necesario pa un buena marcha den e eleccion manera nos por wak esaki na otro paisnan den Reino por ehempel Bonaire, St Maarten y Hulanda. E control por sigui den buena marcha cu of sin e presencia di checker paso tur hende sa cuanto votado tin na cada urna.
FINANSAS PARTIDO POLITICO Y CANDIDATO RIBA LISTA
Conforme e ley pa partidonan politico, desde prome di januari 2021 partidonan politico mester duna cuenta di nan finansas na un Comision finansas partidonan politico (Commissie financiën politieke partijen). E presidente di Conseho Electoral ta presidente di e Comision aki. Alrededor di eleccion candidatonan riba lista y partidonan politico mester duna cuenta na e Comision di locual nan a haya di nan sponsornan y donadornan. E Comision finansas partidonan politico a notifica e partidonan politico y candidatonan riba lista di nan obligacionnan y lo publica e informacionnan aki via di e website di Censo bou di e link Verkiezingen 2021 pronto.
Gobierno a firma cu sindicatonan pa cuminsa paga indexering atrobe
ORANJESTAD – Prome minister Evelyn Croes a informa cu dialuna nan a firma un acuerdo historico cu sindicatonan di empleado publico riba e tema di indexering 2018-2023, reconociendo un compensacion di perdida di forsa di compra di 11.7%, den e periodo di 2018-2023 den cual tabata tin un inflacion di 16.8%. “Nos a negocia intensamente den ultimo lunanan, na forma profesional y cu respet. Salario di empleado publico lo aumenta cu 6% entrante 1 di juli 2024, y cu 5.7% entrante 1 di januari 2025” e mandatario a sigui bisa.
Croes: Desempleo ta sigui baha te na 4% den 2023
ORANJESTAD - Dialuna mainta durante conferencia di prensa di Gobierno, Minister di Labor a anuncia e noticia cu e porcentahe di desempleo pa aña 2023 a baha te na 4%, di 5.2% cu e tabata na 2019.
Minister di MEP ta exigi rectificacion contra dos periodista di 24ora.com
ORANJESTAD – Secretario general di partido MEP, Endy Croes, a confirma cu e la exigi rectificacion di e representantenan di e portal 24ora.com Patrick Paskel y Speed Andrade. Loke ta hala atencion ta cu e comunicado ta manda como secretario general di MEP, pero ta pa exigi rectificacion pa su funcion di Minister. Segun Croes, berdaderamente, a manda un carta di rectificacion pa nan, comokiera cu nan keda biba den pasado y cierto momento a exresa cu ‘Minister Endy Croes ta un convicto di husticia’. Segun Croes, e palabra convicto ta nifica cu un hende ta haya un sentencia (strafrechtelijk) y a bay cera of tin e sentencia y su casonan ta den proceso ainda, cual niun di esakinan ta e caso. Croes den su comunicado ta bisa di a splica claramente cu e no ta un convicto y nunca a yega mesa berde (strafrechtelijk) den e caso di Lotto. Si a bringa diferente caso civil entre otro, e rapport di Ernst de Jong cu a gana te den cassatie y ainda 14 aña despues tin un caso andando, paso e caso den cassatie a indica cu berdad e rapport di Ernst & Young ta completamente falso. Pues esey ta e ultimo caso cu ta andando.
Presion di CAFt a pone gobierno kita 16 miyon pa RWZI di e prespuesto
ORANJESTAD – Presion di e colegio di supervision financiero CAFt a pone gobierno di Aruba kita 16 miyon florin presupuesta pa e planta di RWZI. Asina e mandatario a confirma diabierna despues di su reunion cu director di DOW, Marlon Croes. Durante e reunion cu a trata mas tema, tambe a trata e tema importante di RWZI, no solamente e plantanan na Bubali, sino tambe RWZI Parkietenbos y RWZI Zeewijk. A papia riba e retonan cu tin cu esakinan y e importancia y e urgencia cu tin pa e privatisacion.
Condecoradonan a ricibi nan ‘cinta’ pa nan esfuerso y dedicacion boluntario na pais Aruba
ORANJESTAD – Manera cu Noticiacla a raporta anteriormente caba, diabierna 26 di april, un dia prome cu Dia di Rey, 18 ciudadano di pais Aruba a ricibi un Condecoracion di Rey Willem Alexander. E momento aki, ta conoci como Ocasion General, y ta relaciona cu e cumpleaño di Su Mahestad, Rey Willem-Alexander, cu ta esun cu ta otorga e condecoracion na e personanan cu a duna un contribucion special na e sociedad. Riba e mainta aki, 16 di e condecoradonan tabata presente pa ricibi nan Condecoracion Real di Gobernador di Aruba, señor Alfonso Boekhoudt, kende a splica dicon e personanan aki a bin na remarke pa un reconocemento asina importante. Dos persona no por a ricibi nan condecoracion, entre nan Nicole Hoevertsz cu ta den exterior pa compromiso deportivo. Potretnan cortesia di gobierno di Aruba.
Video: Ryçond Santos do Nascimento ta considera su entrada den AVP como un eror
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
Follow NoticiaCla
