Bermudez a topa van Zwol na Hulanda, en route pa Paris

DEN HAAG – Na caminda pa Paris siman pasa, minister di finanzas di Aruba, Angel Bermudez, a topa cu ‘top ambtenaar’ Richard van Zwol den un otro intento pa logra yega na un acuerdo riba e situacion financiero di Aruba. Despues cu e ultimo bishita di van Zwol na Aruba no a conduci na nada concreto, a palabra cu lo a haci un intento mas na Hulanda. A palabra e momento ey cu Bermudez lo a usa su biahe pa Paris (pa e forum di OECD), pa haci un ‘pitstop’ na Hulanda y bishita e representante halto di Hulanda. E intencion tabata pa nan topa dia 8 di februari ultimo. No ta conoci con a bay cu e reunion aki, y si partidonan a yega mas serca di otro.

ACTITUD HULANDA

Hulanda mientrastanto a tuma un actitud di ‘sinta back, y wak kico Aruba ta haci cu su presupuesto 2015’, prome cu e tuma e siguiente paso. Y e informacion nan cu NoticiaCla.com tin, ta cu durante e proximo conseho di minister di Reino dia 6 di maart, por tin mas informacion riba kico Hulanda por y lo haci cu Aruba riba e asunto financiero. Tin indicacion cu mescos cu a spera St Maarten recientemente, cu Aruba lo por wordo presenta cu un alternativa mara na tempo, pa drecha su situacion financiero.

BIAHE PA PARIS

Mientrastanto Bermudez a sigui su rumbo pa Paris conhuntamente cu Minister Plenipotenciario, drs. Alfonso Boekhoudt y un delegacion di Banco Central pa atende e asina yama 'Peer Group Review'. Esaki ta un tayer organisa pa e Forum Global di 'Organization of Economic Co-operation and Development' (OECD). E organisacion aki ta supervisa e mecanismo di intercambio di informacion pa asuntonan di impuesto na nivel mundial y aña pasa caba un team di experto a bishita Aruba pa realisa un sondeo basa riba con e leynan aki ta funciona, principalmente despues cu Aruba durante e ultimo añanan a amenda su legislacion pa por cumpli cu tur e exigencianan riba e tereno aki. Durante e reunionnan na Paris, varios delegacion di diferente pais manera, Corsou, Suisa, Portugal, Hungria y Uruguay a haci nan presentacion pa splica loke cu e team di experto aki a observa den nan pais. E obhetivo principal di e ehercicio aki ta pa coordina e esfuersonan contra e crimen di labamento di placa y financiamento di terorismo. Aki un luna e Forum Global di OECD lo conclui y cualifica e rapport di cada pais, caminda nan lo indica tambe na ki nivel e paisnan ta cumpli cu e reglanan internacional encuanto transparencia y intercambio di informacion pa asuntonan di impuesto.