Aruba Circular Economy Foundation a wordo incorpora

ORANJESTAD -   E meta di Aruba Circular manera cu Aruba Circular Economy Foundation (ACEF) lo yama su mes ta; pa traha hunto cu departamentonan gubernamental, fundacionnan, insitutonan nacional y internacional, comercio y comunidad di Aruba en general riba e meta comun di facilita y aporta na e transicion pa un economia circular sostenibel pa un comunidad mas sano, feliz y sigur.

ACEF awor ta oficialmente un fundacion “non-profit’ basa riba membresia cu meta pa complementa y agrega balor na Aruba su proceso di transicion pa bira un isla cu un economia circular sostenibel. ACEF lo contribui na materialisacion di e Mision Nacional Economia Circular describi den e masterplan di Aruba “Reposition our Sails” di 2020 y Aruba su “Vision Economia Circular 2050”. Ambos documento ta contene recomendacionan riba termino corto y largo pa por logra un transicion pa un economia circular sostenibel.

Pakico e ta asina importante pa Aruba no keda atras den e transicion pa un economia circular? Paso un economia circular lo brinda cuponan di trabou nobo, e lo incentiva actividadnan productivo y economico nobo, como tambe innovacion, competitividad y diversificacion di economia di conocemento. Tambe e lo aporta na crea mas independencia di importaction di producto y conocemento. E lo hasi Aruba mas resiliente contra cualkier crisis of calamidad den futuro.

ACEF su principionan ta: 

-        Reconoce cu desperdicio tin balor economico;   

-        Mantene producto y material den uzo continuo y pa tempo largo;

-        Yuda regenera recursonan natural y servicionan ecologico y construi capital natural;

-        Enfoca riba bienestar social, economico y medio ambiental pa awo y pa futuro generacionan; 

-        Y forma ekipo pa partnerships fructifero

Kico ta economia circular? Economia Circular ta representa un cambio di perspectiva den con nos como Arubiano lo por biba y prospera riba nos isla. Un economia circular cu actividadnan productivo y comercial ta brinda oportunidad pa un y tur yega na trabou digno cu ta mas den harmonia cu nos medio ambiente, nos mesun bienestar y ta respeta e capacidad di carga di nos isla. Un economia circular ta diseña sin crea desperdicio y polucion, ta mantene tur producto y material den uzo y ta regenera tur sistemanan natural.

Directiva di ACEF ta consist actualmente di: 

-        Christle Nieuw, un studiante den su ultimo aña di Organization, Governance and Management na Universidad di Aruba. Christle a haci varios investigacion relevante den forma di entre otro rapport y scriptie den e area di medio ambiente, sostenibilidad y seguridad di cuminda na Aruba.

-        Joselin Croes, actualmente Minister Plenipotenciario di Aruba na Washington DC, a caba di termina un estudio riba Economia Circular y ta haciendo un Masters di Maneho Ambiental, tambe e ta miembro di Oceans Foundation.

-        Kevin de Cuba tin mas di 15 aña di experiencia internacional na Merca, Latino America y Caribe riba temanan di medio ambiente, e.o. energia renobabel, cambio climatico, maneho di desperdicio y awa, diseño “cradle to cradle” y economia circular. E ta co-fundador di Americas Sustainable Development Foundation (ASDF), Circular Economy Platform of the Americas (CEP-Americas), Circular Economy Forum of the Americas (CEFA), Circular Policy Mentor na Circular Economy Club, Technical Advisor na Cradle to Cradle Products Innovation Institute y entre 2019-2020 Embajador di Economia Circular pa Gobierno di Aruba. 

-        Bauke tin amplio experiencia den e sector financiero y diferente funcion administrativo. E a sirbi comunidad di Aruba mane boluntario den diferente organisacion non-profit como tesorero.

-        Egidio Bundel ta un purpose-driven entrepreneur, consultant, experto den economia circular y un young professional cu tin mas di 5 aña trahando na un di e banconan mas sostenibel na mundo. E ta un intrapreneur cu sa con pa conecta cu hende y transmiti su pasion pa sostenibilidad door di integra su personalidad den locual e ta haci.

ACEF ta invita tur persona cu ta sinti nan mes yama pa yuda e organisacion den e transicion di nos economia linear pa uno circular pa Aruba, pa join nan. Subi e website www.arubacircular.org pa haya sa mas over di economia circular, caminda cu lo tin varios video y charla y tambe nan roadmap di 2021 te cu 2024.