Maduro: Presupuesto 2021 mas sigur no keda aproba prome cu eleccion Parlamentario

ORANJESTAD – E presupuesto di pais Aruba pa 2021 lo no keda trata prome cu e eleccion Parlamentario. Por lo menos asina minister di finanza Xiomara Maduro a sugeri dialuna mainta durante un conferencia di prensa di gobierno. E mandatario cu ta responsabel pa e presupuesto, a bisa si cu e ta entrega caba basta tempo na Parlamento y cu awor gobierno a caba manda e contesta di e preguntanan pa e parlamentarionan. Ideal lo tabata pa e presupuesto pasa awor, pero, realisticamente mira esaki ta imposibel, mirando cu eleccion ta otro siman diabierna. Pa ley, presupuesto mester ta entrega prome cu 1 di September di e aña anterior, y desde CAFt su introduccion, trata y aproba prome cu dia 15 di December di e aña prome. Ningun di dos a sosode y no ta sosodiendo pa algun tempo.