CDC: Aruba a pasa di nivel 4 pa nivel ‘desconoci’ di Covid19 pa biaheronan Mericano

WASHINGTON – Aruba a bay di nivel 4 (esun mas halto contra biahe) pa ‘nivel desconoci’ di Covid19 cu ta esun mas abou cu nivel 1. Tabata e siman aki cu e Centro pa control di malesa y prevencion (CDC) a suavisa restriccion di biahe pa riba 110 pais y teritorio. Aruba tabata un di nan cu a conoce un cambio. Mientras cu e esun mas abou (gris)  esaki no necesariamente ta positivo, sino mas bien ta uno cu ta cuestiona e ‘nivel’ pa possible falta di informacion y ta pone cu no conoce e nivel di Aruba. Den cuadro di esaki, CDC ta bisa cu hasta turistanan Mericano cu ta completamente vacuna, por ta na risico pa contagia y plama e variantenan di Covid19. “Si bo tin cu biaha pa Aruba, sigura cu bo ta completamente vacuna’, e mensahe ta bisa. Entre nan ta pidi pa mantene e reglanan local manera uso di tapaboca y distancia social di 1 meter y mei. Di otro banda, e no ta prohibit Mericanonan di biaha pa Aruba y ta positivo cu ta pidi Mericanonan pa vacuna prome cu biaha. Esaki sinembargo no ta un siguransa cu e turista lo no contrae e virus. E siman aki dos turista Mericano cu tabata vacuna, y tabata riba e bapor crucero Millenium di Celebrity, a contagia cu e virus, despues di a sali for di Aruba.