Dos abogado a haya castigo pa a viola secrecia di cliente

ORANJESTAD – Raad van Toezicht op de advocatuur (Conseho di Supervision riba Abogacia) a ‘castiga’ abogadonan mr Hendrik Croes y mr Anthony Ruiz recientemente den un caso cu Fundacion Nos Ta Aruba y sr Jan de Ruijter a cuminsa contra e bufete y e dos abogadonan. Ta trata di un caso unda cu sr de Ruijter ta haya cu e bufete y e abogadonan a viola e secrecia entre cliente y abogado ora cu un trahado di e bufete, publicamente durante un conferencia di prensa di de Ruijter, a saca informacion ‘confidencial’ pafo. Conseho di Supervision riba Abogacia a haya cu enberdad e bufete y e abogadonan ta responsabel y como tal a duna nan cada uno un tipo di castigo. Sr Croes a haya un ‘berisping’ y sr Ruiz a haya un ‘waarschuwing’.

E CASO

Tabata durante un conferencia di prensa di e fundacion Nos Ta Aruba cu a tuma lugar dilanti di edificio den cual e bufete di e abogadonan ta situa cu e incidente a tuma lugar. Ora cu e conferencia tabata tuma lugar, en vivo riba television y facebook, un trahado di e bufete a sali pafo y a probecha pa recorda sr de Ruijter cu e tin un cuenta habri pa un caso cu e bufete a trata pa e cliente. Aki e trahado la haci mencion di e suma y tambe e nomber di e compania cu cual de Ruijter tabatin debe supuestamente. Algo cu mester keda secreto entre cliente (de Ruijter) y e bufete. 

ARGUMENTACION

Conseho di Supervision riba Abogacia a argumenta cu e no ta haya admissible pa e fundacion ta den e caso aki pasobra e fundacion no tin ningun importancia y relevancia den e caso aki. Tampoco ta relevante e keho cu de Ruijter e entrega cu e trahado a strobe e conferencia di prensa. Esaki pasobra e.o. ta de Ruijter mes a scohe e lugar, e trahado no a practica violencia, ni a usa palabra ofensivo. Loke si ta relevante segun Conseho di Supervision riba Abogacia, ta cu a viola e parti di secrecia di abogacia. Aki ta unda cu abogado Croes durante e caso a ofrece su disculpa na nomber di dje, colega abogado Ruiz y e bufete. A reclama e hecho cu e trahado no tabatin e derecho di haci loke el a haci, mirando cu tabatin tur otro forma disponible pa logra e meta pa ‘colecta’ e supuesto placa atrasa. Ademas e trahado(nan) di e bufete mester ta na altura cu tin secrecia y cu cierto actonan no ta permissible. Y pa esaki Conseho di Supervision riba Abogacia ta tene e abogadonan di e bufete responsabel. E hecho cu e abogado a ofrece su disculpa tras di porta cera (den corte) no ta suficiente pa remedia e situacion segun Conseho di Supervision riba Abogacia, pasobra e daño a tuma lugar publicamente. Como tal a dicidi pa declara e keho di sr de Ruijter como valido, pa cual e dos abogadonan a haya nan respectivo castigo. Por lesa e veredicto AKI.