Oil Spill na Barcadera a haci daño, pero ta contene

ORANJESTAD – Nos planta di awa, WEB a confirma e oil spill riba laman awe merdia. Segun e vocero di e planta, Asja Dongen, awe mainta nan a haya melding cu tin petroleo riba laman entre WEB y Aeropuerto parti paden di rif. Gerencia di WEB a pone instancianan na altura y ta den reunion cu representantenan di Rampenbureau, Directie Scheepvaart y Directie Natuur en Milieu. A haci un investigacion interno y a resulta cu e petroleo aki, ta procedente for di un tanki di Heavy Fuel Oil na WEB. A tuma accion mesora y a sa di stop e lek na e tanki. Tambe a pidi asistencia di Valero cu tin experiencia cu e incidentenan aki pa minimalisa e daño na medio ambiente. Na e momentonan aki un team di e diferente instancianan ta riba laman pa investiga e grado di daño, principalmente na rif. En todo caso na e momento aki cu asistencia di Valero ta cubri e parti di petroleo cu boom (tipo di boey) pa e no sigui plama mas leu den lama. Lo trata e petroleo cu kimico responsabel. Ta trata di un area basta grandi, cu ta core paden, esta for di WEB te na altura di aeropuerto. Manera e fotonan cu NoticiaCla.com tin den su poder ta mustra, e la haci daño caba na cierto parti di naturalesa, aunke ta purbando pa contene esaki mas cu ta posibel.