Abogado ta bringa condicionan di detencion di Parlamentario Sevinger

ORANJESTAD – Abogado di e parlamentario deteni Benny Sevinger ta bay cuminsa un caso di hoger beroep contra Ministerio Publico pa ‘suavisa’ condicion di detencion di su cliente na KIA. Despues di e prome parti di su detencion na warda di Santa Cruz, a traslad’e recientemente pa KIA unda cu e tin cu sinta su 16 dianan siguiente. Segun mr Kock, su cliente a haya e maximo prohibicion durante su detencion, cu ta ensera e.o. cu e no por ricibi bishita di famia, no por tin aceso na buki, television, ta den cercania di otro preso, pues en corto, ta completamente isola durante su detencion. E unico cos cu e ta haya ta luchting pa un ora pa dia. E ta wordo trata como un criminal pisa, siendo cu segun mr Kock, e caso aki ta uno cu no merece tal restriccion. Como tal e ta bay entama un caso e siman aki pa suavisa tur esaki. Ademas el a clarifica cu contrario na informacion cu ta circula, su cliente no ta goza di beneficionan special manera ta cera den un oficina envez di un cel. E ta cera den un cel, solamente cu e ta completamente isola di otro presonan, pues no ta manera ta wordo bisa, cu supuestamente e tin un situacion ‘di luho’.