Mayoria hende toch ta bisa di lo sigui bisti tapaboca aunke no ta obligatorio mas

ORANJESTAD – Den un encuesta lihe haci diamars riba Facebook, por compronde cu di 10 hende, 8 ta bisa cu no obstante cu entrante awe, uso di tapaboca no ta obligatorio mas, nan lo sigui bisti nan tapaboca toch, como si fuera cu no a cambia e regla. Mayoria ta considera esaki pasobra ainda no tur hende a vacuna y no ta sigur ken ta ‘liber’ di e virus of no. Como tal entre esnan encuesta, mayoria ta bisa cu nan lo mantene nan tapaboca bisti. 

SUAVISA MEDIDA

Manera ta conoci, e siman aki gobierno a anuncia cu entrante awe, ta pone cu bisti tapaboca no ta obligatorio, sino recommendable. Ta recomenda pa bisti esaki ora cu no por tene distancia di 1.5 for di un persona. Ademas a suavisa mas medida cu tabata vigente, manera mas musico por toca, mas hende por sinta na mesa hunto den un restaurant, y ta elimina e ‘gebiedsverbod’.