Baluarte di Noord y deporte en general Ovito Tromp a fayece

ORANJESTAD – Un baluarte di deporte, specialmente pa e districto di Noord, Ovito Tromp a fayece awe mainta. For di momento cu e noticia a plama, mensahe di tristesa, storia y di pesame a podera di rednan social. Ovito Tromp tabata presidente di Centro di Bario Noord, y e luna aki ta haci net un aña cu e la sera un acuerdo cu gobierno di Aruba. Tabata prome minister Eman cu aña pasa februari a keda masha contento di por a cera un acuerdo di cooperacion hunto cu Centro di Bario Noord representa dor di su presidente Ovito Tromp, ‘caminda ta manifesta e boluntad pa sinta, planifica y traha hunto cu pais Aruba, e oficina cu ta maneha e Facilidadnan Multi-funcional y tambe Departamento di Desaroyo Comunitario.’

Den asunto di deporte, e tabata conoci como un persona cu a traha incansablemente pa e bario di Noord. No solamente pa su Carnaval pero tambe riba diferente otro tereno manera enseñansa, deporte y social. E tabata considera como un icono di baseball local. E la guia CBN Eagles baseball organization como su presidente. “ Ovito Tromp, un persona cu henter su bida a dedica su mes na nos muchanan di Noord riba tur tereno, tabata un gran persona y semper cla pa duna un man unda cu esaki tabata tin mester.

“Nos tabata tin e honor di a conoce meneer Ovito guiando su hungadonan infantil di baseball den e ekipo Centro di Bario Noord, semper cu e sonrisa riba su cara. E bario di Noord sigur a perde un gran persona pero lo sigui hiba e norma y balornan cu su persona semper a siña cada un di nan” ta un di e otro mensahenan manda awe mainta. NoticiaCla. com ta manda palabra di condolencia y hopi forza na henter su famia y e bario di Noord completo. Fotonan cortesia di Seever Krozendijk, y tambe oficina di gobierno di Aruba.