Fons Simon na Corsou: Banco di Caribe ta stabil i solido

WILLEMSTAD - Banco di Caribe ta stabil i sólido. Benta di un banko no ta nada straño. Na Kòrsou tin diferente banko a keda bendí i asta ora un banko ta bai bon ta lanta interes. Esaki no ta pone na peliger sèn di klientenan den Banco di Caribe. Esei ta loke por  a komprondé di e CEO Fons Simon.

Banco di Caribe a tuma nota di informashon ku ta sirkulando den komunidat i ta informá ku no tin motibu pa preokupashon. Resientemente e banko a publiká su sifranan ku ta indiká un subida di su kapital. Aparte di esaki e banko ta solvabel loke ta nifiká ku tin sufisiente likides pa garantisá seguridat di e fondonan di kliente. No tin problema ku Banco di Caribe, sr. Fons Simon a enfatisá.

E banko ta referí na CBCS pa mas informashon di un posibel benta. Banco di Caribe ta sigui ku su aktividatnan bankario i lo kontinuá su operashonnan na benefisio di tantu kolega komo kliente. Esaki segun, CEO i General Managing Director di e banko, sr. Fons Simon.

BANKO CENTRAL

Banko Sentral di Kòrsou i St. Maarten ta informá ku dia 4 di yüli 2018, tribunal di promé instansia di Kòrsou a dikta e reglamentu di emergensia pa loke ta Ennia Caribe Leven NV i Ennia Caribe Holding NV. Propósito di e regulashon di emergensia ta un restrukturashon di Ennia ku e fin di restourá e solvensia di e kompania, na interes di e aseguradonan di Ennia.

Banko Sentral ta sigui bisa ku komo parti di e restrukturashon di ENNIA, ta analisando diferente opshon ku por kontribuí na éksito di esaki.

E opshonnan bou di konsiderashon tambe ta inkluí e posibilidat di bende e akshonnan di Ennia, inkluyendo e akshonnan di Ennia den Banco di Caribe.

Banco di Caribe no ta kai bou di e reglamentu di emergensia, no tin motibu pa a hasi esaki. Banko di Caribe ta un aktivo ku ta aportá ku su kontribushon positivo na e grupo di ENNIA.

Kualke benta di Banco di Caribe lo generá entrada ku lo benefisiá e restrukturashon. Den e restrukturashon banko Sentral lo pone atenshon den e interesnan di e aseguradonan di ENNIA i pa loke ta Banco di Caribe riba e depositantenan. NOTA: E texto ta scirbi na papiamento fonetico di Corsou.