Abogado General ta sostene sentencia cu Gerrit Schotte mester paga 2 miyon na Ministerio Publico

DEN HAAG – Abogado General Edwin Bleichrodt (52) ta haya cu e sentencia contra ex premier Gerrit Schotte unda cu e tin cu paga casi 2 miyon florin bek na Ministerio Publico ta corecto. Esey ta su conseho na Hoge Raad riba e caso cu sr Schotte a apela den casacion na Hulanda. Awe Bleichrodt a publica su conseho na Hoge Raad. Y ta masha inusual pa Hoge Raad no tuma e conseho di e Abogado General. E sentencia mes dia 7 di September 2021. Si mantene e sentencia di corte di prome instancia, sr Schotte tin cu paga e placa ey bek of bay cera atrobe pa un periodo di 3 aña. 

E CASO

E caso tabata data di tempo cu Schotte tabata premier na Corsou y lo a ricibi placa di soborno a cambio di fabornan politico. A calcula e suma na 1.844.190,36 florin cu Schotte tin cu paga Ministerio Publico bek. Schotte ta argumenta cu entre otro e placa no tabata pe personalmente sino a wordo deposita riba cuenta di su pareha e tempo ey, pa campaña politico pues pa e partido y no personalmente. Y no a haci e deposito na su nomber sino na nomber di partido. Esey ta un di e alegacionan di sr Schotte. Sinembargo e abogado general ta indica cu tin suficiente prueba cu ta comproba e sopecho y acusacion di Ministerio Publico y cu e sentencia original por keda vigente. Schotte a cumpli cu su sentencia di 3 aña pa corupcion y labamento di placa na December ultimo.