CAFT preocupa cu Aruba ainda no a aproba presupuesto pa 2021

ORANJESTAD – E hecho cu gobierno di Aruba ainda no a aproba e presupuesto pa 2021, ta wordo considera como un situacion preocupante. Asina Colegio di Supervision Financiero CAFt ta bisa den su reaccion riba e prome raporta di cuartal di 2021 di Aruba. CAft ta recorda gobierno cu Rijksminister Raad a bisa Aruba for di dia 26 di maart ultimo (4 dia despues gobierno di Aruba a cay) pa aproba e presupuesto mas tarda 15 di April y pa tene cuenta cu e  recomendacionan di CAft. Pero ainda esaki no a keda trata y kier pa esaki sosode mas liher cu ta possible. Ta interesante si pa mustra cu den e ultimo reaccion di e colegio di supervision, no ta bisa nada di e caida di gobierno di Aruba, 4 dia despues cu RMR a duna e conseho actual y cu e caida di gobierno por tin efecto riba e tratamento di presupuesto aworaki. 

RECOMENDACIONAN NO TUMA

Atrobe CAft ta mustra tambe den su ultimo reaccion na gobierno, cu tin un cantidad di recomendacion cu Aruba no a procesa den e presupuesto. Aruba lo a informa cu nan ta warda e efecto   di e plannan di e agenda di ehecucion di e landspakket prome. Entre e recomendacionan, CAft a conseha pa revoca e reduccion di e loonbelasting, y pa ahusta e gastonan di bienes y servicio y tambe pa e asina yama 'loonsubsidieregeling/TIO-regeling. Pero debi cu Aruba ainda no a implementa e recomendacionan, e deficit ainda ta wordo insuficienemente ahusta’ e colegio ta sigui bisa. 

NO TA LOGRA SPAAR CU AZV

CAFT ta bisa tambe cu for di e UR, cu AZV ta bisa cu e no ta logra spaar 60 miyon di e prespuesto e aña aki debi cu e pakete di austeridad y e ‘contribucion propio’ como parti di e 5 wave model, ainda no a keda formalisa. CAFt ta recorda gobierno di Aruba cu mester tene su mes na palabracion cu RMR pa un reduccion di gasto di 60 miyon di AZV. CAFt como tal kier sa cua medida di control Aruba lo tuma pa logra e suma aki toch. 

 CUMPLIMENTO DI IMPUESTO

Tambe CAFt ta mustra cu pa un miho cumplimento di pago di impuesto ta di gran importancia pa e departamento di impuesto funciona miho. CAFt ta mustra riba e hecho cu ta mandando cobransanan di grondbelasting laat, cu ta pone cu no por haci pago mas den 4 termino. Ademas, e cobransa pa impuesto di vehiculo di motor, ta pone cu un tercer parti di e impuesto pa vehiculonan di motor no ta wordo paga. Pa un relato completo di e reaccion di CAFt, lesa AKI.