Valero: A cuminsa desmantela y bende partinan di refineria na Aruba

SAN ANTONIO/SAN NICOLAS – Refineria Valero a cuminsa cu su proceso di desmantelacion na Aruba. Esaki a keda confirma awe mainta pa e vocero corporativo Bill Day na NoticiaCla.com. Tabata den fin di siman caba cu a cuminsa circula informacion di e noticia. Hunto cune, tabatin un flyer cu ta informa (cu potret) riba e partinan cu ya ta na benta y unda cu por acudi pa ricibi esakinan. (Wak e flyer aki). Den fin di siman, ehecutivonan na Aruba mes a confirma esaki na NoticiaCla.com, pero dialuna mainta e confirmacion oficial a drenta.

“Valero ta preparando pa desmantela e refineria (na Aruba) pa e sitio por wordo prepara pa ‘re uso’” Day a bisa awe mainta. “E ekipo na e sitio lo wordo sea bendi na pida, of desmantela completamente”. Mes momento sinembargo, tin posibilidad cu un cumprado pa e refineria completo por aparece. “Pero no tin ningun indicacion di esaki, pues Valero ta procede cu e plannan di desmantelacion”, e vocero a sigui confirma.

Manera ta conoci, e propiedad ta keda bou di mando di Valero, te fin di e aña aki. Unabes cu e tempo ey vence, e tereno ta pasa bek pa pais Aruba. Y mirando e tempo, Valero a cuminsa pues cu e trabounan di desmantelacion pa e por keda cla na tempo. Aña pasa NoticiaCla.com a raporta caba cu a cuminsa prepara e proceso pa un destaho publico pa tin companianan cla pa por cuminsa cu e proceso di desmantelacion. Awor cu aña a bolter, enberdad a confirma cu a cuminsa cu e proceso awo. No ta conoci con largo e proceso aki di benta di e partinan y desmantelacion lo tuma, ni con e ta afecta e parti di e 'transshipment'.  NOTA: e foto ta un di archivo di e refineria den operacion.