Baby a nace durante pleno buelo di KLM bayendo Hulanda

Baby a nace durante pleno buelo di KLM bayendo Hulanda

Posted on 06/7/2021 9:49 am AST | Updated on 06/7/2021 9:50 am AST

SCHIPHOL – Un baby a nace riba un buelo recien di KLM durante e buelo di Nairobi (Africa) pa Schiphol, Hulanda. E avion tabata riba 12 mil pia ora di haltura ora cu un pasahero a duna luz. Pa suerte di e dama, tabatin un docter abordo cu a asisti cu e parto. Tanto e mama y e baby tabata saludabel. No ta conoci cuanto siman/luna e mama tabata na estado. Esaki ta debi na situacion di privacidad di e dama. Ta algo hopi inusual cu ta sosode ya cu acontecimento special a tuma lugar riba buelo ya cu normalmente ta desconseha damanan cu 36 siman di embarazo pa bula den avion. Pero semper tin circumstancia cu un baby por nace prome cu tempo. E parto pues a bay normal y no tabata necesario haci un aterisahe di emergencia. E buelo a sigui normal pa Hulanda.   

 

  • Hamer: Formacion di gobierno Hulandes a pega!

    Hamer: Formacion di gobierno Hulandes a pega!

    DEN HAAG – Formacion di gobierno Hulandes a pega. Asina e informador Mariëtete Hamer a bisa diabierna. Ta trata di e problema unda cu cierto partidonan no kier sinta na mesa cu otro. Asina e portal rtlnieuws ta raporta. Hamer a sinta diabierna merdia cu partidonan VVD, D66, CDA, PvdA, GroenLinks y ChristenUnie. Hamer kier pa e partidonan pensa bon e fin di siman aki y kier haya claridad di nan dialuna riba ken kier traha cu otro. El a puntra partidonan pa kibra e impasse aki e fin di siman aki. “Esey nan tin cu haci hunto”.

  • Hulanda satisfecho cu avansenan na Aruba no obstante campaña

    Hulanda satisfecho cu avansenan na Aruba no obstante campaña

    ORANJESTAD/DEN HAAG – Rijks Minister Raad ta satisfecho cu e avansenan cu Aruba ta mustrando, apesar cu tin campaña electoral tumando lugar. Asina prome minister Evelyn Wever Croes a informa awe mainta riba e reunion di RMR cu a tuma lugar awe mainta na Den Haag.  E portal aki a confirma tambe cu enberdad, cos a bay bon pa Aruba den e reunion. “ Awor e siguiente paso ta pa Tweede Kamer aproba e fiansa pa nos haye. Ta spera cu den juli nos lo haye. Manera nos a planea” sra Wever Croes a sigui bisa. Ta trata di e 181 miyon florin cu Aruba tin cu haya como placa pa e di 3 cuartal como ayudo manera acorda. E proceso ta cu unabez cu RMR duna su aprobacion, e ta pasa pa Tweede Kamer cu tin cu aproba esaki tambe. Manera ta conoci, awe RMR mester a reuni y trata e proximo fiansa pa e islanan den Caribe Hulandes. Y for di e reunion aki, ta mustra cu Aruba ta ‘ok’ y cu e ta bay haya e siguiente ‘saco di placa’ den luna di juli. 

  • Denzel Dumfries a bolbe resalta den victoria di Hulanda contra Austria

    Denzel Dumfries a bolbe resalta den victoria di Hulanda contra Austria

    AMSTERDAM – Cu e victoria diahuebs di e seleccion nacional di Hulanda contra Austria di 2-0 den e Copa Europa, e ekipo a postula su mes como ganador di su grupo, y a postula su mes pa e octavo di final. Tabata un penalty (danki na un atropeo riba Denzel Dumfries) di Memphis Day cu a habri e wega 1-0 pa Hulanda. Despues tabata atrobe e mesun Denzel Dumfries cu a hinca e gol final (dos gol den dos partido), cu a percura pa e victoria. Dialuna e seleccion tin cu hunga ainda contra Noord Macedonia pa despues sigui den e siguiente ronda otro siman diadomingo (no esun aki) na Budapest contra e number tres di grupo D, E of F. Eseynan no ta conoci ainda. Ta haci mencion di p.e. Portugal of Alemania entre e posibilidadnan. Notable tabata e naracion Hulandes cu a pone hopi atencion riba Dumfries, y dado momento a bisa cu ‘e forza di Dumfries ta sin igual’, y ‘Esaki ta keda e torneo di Dumfries’, indicando cu tanto den e prome como e di dos wega, Dumfries tabata e homber clave. Den e prome wega e la hinca e gol ganador, y den e wega aki, ta danki na dje, Hulanda a haya un penalty y unda cu e mes a hinca e di dos gol. Aki na Aruba e gritonan tabata hopi, mirando cu Dumfries tin famia na Aruba (su propio tata ta Rubiano).

  • Pronto Aruba, Corsou y St Maarten por usa Coronacheck App den Europa

    Pronto Aruba, Corsou y St Maarten por usa Coronacheck App den Europa

    DEN HAAG – Residentenan di Bonaire, St. Eustatius y Saba entrante prome di juli por usa e asina yama Coronacheck app como pruebna di un resultado di test negativo, un vacuna of un recuperacon di Covid19. Ainda no tin solucion si pa residentenan di Aruba, Corsou y St Maarten. Tweede Kamer di Hulanda diamars a aproba e aspecto legal di e Coronacheck app.  Door di link e coronacheck app cu e future Digital Corona Certificate (DCC) di Union Europeo, e app por wordo usa entrante 1 di juli durante biahenan den Europa. Pa usa e app, ciudadanonan nan number BSN y un ID digital DigiD, ta necesario. Residentenan di islanan CAS (Corsou, Aruba y St Maarten) no tin esaki, autoridadnan Hulandes ta buscando forma pa laga e residentenan aki usa e Coronacheck app tambe. Pero a compronde cu e residentenan di islanan Bonaire, Statia y Saba tampoco tin esaki, pero como cu nan ta parti di Hulanda, esaki ta wordo regla. Ta reglando un website unda cu por upload e carchi di papel di prueba di vacuna, y ta spera cu esaki por bira operacional pa 1 di juli proximo. 

  • Rey Willem Alexander no ta presente pa wak wega di Hulanda awe

    Rey Willem Alexander no ta presente pa wak wega di Hulanda awe

    AMSTERDAM – E biaha aki si Rey Willem Alexander y Reina Maxima lo no ta presente den stadio pa wak e wega di Copa Europa entre Hulanda y Austria. Asina e Rey mes a bisa durante un bishita diahuebs mainta na e museo di Amsterdam, unda cu e la presencia e apertura di e expo di e Gouden Koets. E wega recien di diadomingo unda cu Hulanda a gana Ucraina 3-2 a hala hopi atencion pa e forma con e Rey a celebra riba tribuna cu un baile chikito ora cu Denzel Dumfries a hinca e gol di victoria.  

  • Denzel Dumfries a score e gol ganador pa Hulanda gana Ukraina

    Denzel Dumfries a score e gol ganador pa Hulanda gana Ukraina

    AMSTERDAM – Tabata Denzel Dumfries cu den di 85 minuut a score e gol ganador pa Hulanda diadomingo contra Ukraina y gana e prome salida di Hulanda den Copa Europa 2021 3-2. E hecho cu Dumfries a hunga pa seleccion di Aruba den pasado, y cu su tata ta un Arubiano, a pone esnan na Aruba sinti mas special ainda cu ta net Dumfries ta esun cu a hinca e gol ganador. Hulanda tabata e prome pa score pero despues e contrincante na dos occasion a empata e partido, pa despues Dumfries cambia tur esaki. Diahuebs Hulanda ta hunga su siguiente partido, e biaha aki contra Austria. 

  • Powered by SETAR