Palmaruba Group a celebra anuncio di Caribbean Town Villas & Apartments

(ADVERTORIAL)

ORANJESTAD - Diabierna atardi a celebra e anuncio oficial di e proyecto di condominio, Caribbean Town Villas & Apartments situa na Eagle. E compania Palmaruba Group lo desaroya 42 mil meter cuadra di tereno den 330 unidad den un proyecto di 4 edificio grandi di 7 piso mas 32 cas para riba nan mes. E anuncio a sosode den presencia di Minister Presidente, cu alabes ta encarga cu maneho di Infrastructura, director di DOW, DIP y otro instancianan gubernamental cu a partner den e proyecto.

Ingeniero Victor Acosta ta na cabes di Palmaruba Group, cu ta existi desde 1991, pues ta celebra do 30 aña di existencia na Aruba. Nan ta orguyoso cu e compania a alcansa un nivel di desaroyo, innovacion y solides financiero cu nan por inverti den un proyecto di vivienda pa localnan mes. Den pasado, a yega di desaroya varios proyecto di condominio pero pa turista. E proyecto aki lo no ta mucho diferente, djis cu DIP a coopera pa e prijsnan por keda pagabel pa tur hende.

Director di DIP, Haime Croes, a aplaudi e inversion aki den e proyecto di vivienda pa nos localnan. Den su discurso el a subraya cu tin un demanda grandi pa tereno y cas. Cu e tipo di proyectonan asina, ta trece e cumprado y e desaroyado hunto, pa atrae esunnan cu kier yega haya nan cas cla traha caba, cu tereno inclui, piscina, cancha deportivo, park, gym y area comercial. Bibando den un compleho asina lo por conta riba mas siguridad y acceso controla pa yega cas of apartament. DIP a bisa di ta spera cu e proyecto aki por incentiva mas desaroyado pa inverti, pa construi y desaroya terenonan disponibel den proyectonan di vivienda economico pa comunidad.

Ta trata aki di un inversion di no menos di 65 miyon florin y ta financia localmente. Victor Acosta, hunto cu su socio Antonio Onorato, ta convenci cu na october proximo caba por pone e prome piedra y cuminsa construi. For di luna di augustus ta spera di por cuminda bende e unidadnan den forma di pre-construction. Pa e ora ey lo tin un miho bista riba e opcionnan cu tin di un camber, dos camber, tres camber, villanan di dos cas den un y asina por sigui menciona. Hecho ta cu lo tin unidadnan di vivienda pa tur gusto y pa tur cartera!

Palmaruba Group ta existi desde 1991 y ta responsabel pa varios proyecto residencial, di condominio y di hotel riba nos isla. Entre e lista largo di proyectonan, ta figura entre otro Villas Montaña Alta, complehodi apartamento na Boegoeroei, Ponton Plaza, Villas Gran Sabana na Sabana Liber, Montaña Plaza, Palma Real na Palm Beach, Hooiberg Plaza, Calbas Plaza, Oceania Residence, PalmAruba Condos y mas. Nan tin un bon nomber den comunidad pa ta cumpli y finalisa tur nan proyectonan, pa cual banconan local semper a sostene nan iniciativanan residencial.