Encuesta: Mas di 20% di votadornan ainda no sa pa ken na vota

Posted on 06/6/2021 5:52 pm AST | Updated on 06/6/2021 6:04 pm AST

ORANJESTAD – Segun e encuesta ultimo di Noticiacla y Doc Opleidingen, mas di 20% di votadornan ainda no sa pa ken na vota. E cifra exacto ta 21.3% compara cu 77.6% cu si a dicidi caba den e encuesta aki. Entre esnan cu ya sa caba con nan lo vota segun e encuesta, un gran mayoria lo vota pa MEP, sigui door di AVP, Accion21, MAS y RAIZ. E otro partidonan a ricibi menos cu 3% di e votanan den e encuesta. 

CUA LIDER A ‘GANA’ E DEBATE 

Riba e pregunta ki cifra e respondente lo duna e lidernan pa cu nan presentacion den debate, por lo general publico tabata critico. Mayoria a duna e lidernan, incluso esnan di AVP, POR, UPP, CURPA, HTC y Pueblo Prome un cifra no positivo. Entre esnan cu no a dicidi ainda, e sentido ta similar, aunque e percentahenan ta un poco mas abou. Y si por papia di ganador di e debate, e lider di partido cu a ‘gana’ e debate, segun e encuesta aki, tabata Evelyn Wever Croes di MEP (77.5%), sigui pa Miguel Mansur di ACCION21 (72.8%), mientras cu e dos lidernan cu a score mas malo, tabata Alan Howell) 92.1%) sigui pa Gilbert Webb(89.9%).   

CON VOTADORNAN INDECISO TA PENSA 

Pa hanja sa un poco mas con esnan cu no a dicidi ainda ta pensando, a puntra den ki direccion nan ta pensando. Un 52.6 % a indica cu nan lo no considera un partido grandi, mientras cu 4.7% si ta pensando pa vota pa un di e partidonan grandi. Pa loke ta e partidonan ‘chikito’ den Parlamento awor, 35% a indica cu nan lo no considera nan, mientras 13.6% si lo considera nan. E resultado pa e partidonan nobo ta completamente otro, cu solamente 8% di e participantenan indicando di lo no considera nan y 16.7% ta considerando nan seriamente (casi sigur). A nivel di partido, e resultadonan pa cu e pregunta aki ta duna un indicacion interesante pa varios di e partidonan. Pa 8 partido, incluyendo MEP y AVP, mas cu 50% di esnan indeciso lo no considera nan. Na otro banda, 3 partido nobo, ACCION21, RAIZ y MAS ta wordo considera como opcion serio of casi sigur pa un percentahe di respectivamente 44.6%, 37.3% y 28.4%.

 

KICO E GRUPO INDECISO TA BUSCA

Kiko e grupo indeciso ta buscando? Informacion. Entre e resultadonan di encuestonan di Noticiacla y Doc Opleidingen ta sali cla cu e grupo aki, cu den e encuestanan a conta pa 10-20% di esnan cu e responde, nan kier sa mas pa tuma un decision. Nan ta interesa den un debate mas, pa duna partidonan e oportunidad di clarifica nan posicion den diferente punto. 

 

KEN TA E GRUPO INDECISO

Y ken e grupo ‘indecivo ta? Nan ta biba den tur e barionan, tin tur edad, y tin un poco mas damas cu cabajero cu ta indica cu nan no sa ainda.

KEN A PARTICIPA NA E ENCUESTA

 

Un poco mas cu 1200 hende a participa den e debate aki, cu a activo manera cu e debate di KVK a caba, y a keda online. Un grand mayoria di esnan cu a participa na e encuesta, a sigui e debate di KVK. Un 56% di esnan di tur cu e reacciona a indica cu e topiconan a contribui na un mihor comprencion di e partidonan, aunque e grupo di hende cu no sa ainda kiko nan lo vota solamente un 40% e topiconan a contribui namihor comprencion. 

DISCLAIMER

E encuesta aki manera tur di Noticiacla, no ta pretende cu e ta cubri henter Aruba y ta solamente acesible na esnan cu ta online. Ademas ta conoci cu un partido a dicidi caba cu nan no ta participa na e encuestanan, cu ta pone cu nan participacion por refleha un participacion hopi mas abou contrario na e realidad. Asina mes, pa loke ta indicacion, e ta un refleho si pa e partidonan ‘nobo’ con nan ta para. Atrobe, e encuesta aki ta pa duna un indicacion di kico ta biba entre e lectornan di noticiacla.  

  • Hoofdstembureau a añadi 2 persona na registro di voto, aunke fecha di cierre a vence

    Hoofdstembureau a añadi 2 persona na registro di voto, aunke fecha di cierre a vence

    ORANJESTAD - Hoofdstembureau a participa diabierna cu a añadi 2 persona na registro di voto, aunke cu e fecha di cierre a vence caba. Segun e informacion, na cierre di e Registro di Votado cu a cera dia 7 di april 2021, e Registro a cera cu un total di 70.281 votado. 

  • Sigui resultado di eleccion ariba websitenan oficial di gobierno

    Sigui resultado di eleccion ariba websitenan oficial di gobierno
  • Encuesta: Casi 73% di lectornan no kier Censo comparti e kiezersregister

    Encuesta: Casi 73% di lectornan no kier Censo comparti e kiezersregister

    ORANJESTAD – Casi 73% di lectornan di noticiacla cu a participa na e ultimo encuesta di Noticiacla/Doc Opleidingen, no kier pa Censo comparti e kiezersregister cu partidonan politico, mientras cu 12% ta bisa cu si comparti e informacion, e mester ta limita. Awe tardi Corte lo dicta sentencia den e caso sumario cu partido AVP a entama contra minister di Asuntonan General riba e tema. Casi 900 persona a participa den e encuesta entre lectornan di noticiacla. Prome minister Evelyn Wever Croes a informa na noticiacla diamars cu e lo respeta e sentencia di huez, ora cu esaki bira conoci. 

  • Otro medio di comunicacion ta uza encuesta di noticiacla den contexto robez

    Otro medio di comunicacion ta uza encuesta di noticiacla den contexto robez

    ORANJESTAD – NoticiaCla y Doc Opleidingen a tuma nota cu e medio di comunicacion Solo di Pueblo a usa e resultadonan di encuesta di nos portal pa produci un noticia. Den principio, no tin problema cu esey y ta welcome e uso aki, contal cu uza e informacion den contexto corecto. Den su publicacion di e resultado di e encuesta, NoticiaCla y Doc Opleidingen a pone explicitamente (disclaimer) cu e resultadonan di nos encuesta, cu a wordo colecta exclusivamente di forma digital (internet), no por wordo considera como e opinion general di Aruba, pero cu e ta e resultado di e opinion di e lector di noticiacla cu a participa den e encuesta solamente. NoticiaCla y Doc Opleidingen ta lamenta cu su informacion a wordo malinterpreta y usa pa un insinuacion como sifuera NoticiaCla a indica cu su encuesta lo ta representativo pa poblacion di Aruba. 

  • Lider di partido MEP Evelyn Wever Croes ta den Democracia Cla awe nochi

    Lider di partido MEP Evelyn Wever Croes ta den Democracia Cla awe nochi

    ORANJESTAD – Manera anticipa, e programa politico Democracia Cla riba NoticiaCla ta presenta su ultimo edicion cu lidernan politica awe nochi cu e lider di partido politico MEP, sra Evelyn Wever Croes. Durante un ora y mei, e periodista Tito Laclé ta conduci e entrevista cu hopi pregunta riba ultimo temanan di momento y tambe e programa di gobernacion di e partido geel. E programa ta pasa awe nochi 8’or y mei y ta riba e plataformanan di NoticiaCla manera Facebook page, website y App. Riba e ultimo dosnan, bo ta click riba e boton LIVE y ta haya aceso na e programa. No perde!

  • Lider di AVP tabata un ‘no show’ den Democracia Cla riba NoticiaCla

    Lider di AVP tabata un ‘no show’ den Democracia Cla riba NoticiaCla

    ORANJESTAD – Loke mester a bira e di 11 edicion di Democracia Cla riba NoticiaCla cu un lider politico, lamentablemente (atrobe) no a tuma lugar dialuna anochi. Lamentable, pasobra e invitado di turno, lider di partido AVP Mike Eman no a aparece. Ta bisa atrobe, debi cu 4 aña pasa tambe, e mesun lider a opta pa no presenta den e programa. E biaha aki, sinembargo e situacion tabata pior ya cu e biaha aki a confirma no un biaha sino varios biaha, incluso e mesun mainta pa despues atardi keda sin aparece. Cu esaki, e ta bira (atrobe) e unico lider politico cu a keda sin presenta den e programa. 

  • Powered by SETAR