Dialuna Aruba ta activa su ‘bubble’ pa Bonaire y Corsou

ORANJESTAD – Entrante dialuna Aruba ta ‘activa’ su ABC Bubble bek como un di e medidanan di suavisacion pa cu Covid19. Asina prome minister Evelyn Wever Croes a confirma e weekend aki pa noticiacla. Segun e mandatario, esaki kier men cu entrante dialuna esnan cu biaha bin di Bonaire y Corsou, no mester haci un PCR test mas ora cu nan yega Aruba. Di parti di Corsou, a introduci e bubble aki caba, pa esnan cu ta bin di Aruba y Bonaire. Y esaki a crea un confusion pa algun persona. Nan a kere cu esaki tabata valido pa esnan cu yega Aruba tambe di e dos otro dos islanan. 

TARDANSA

E mandatario a admiti cu tabatin un tardansa, debi cu mester a regla e asunto di e ED card online pero esaki a keda cla mientrastanto cu ta pone cu awor si Aruba ta cla pa introduci esaki entrante dialuna. E ta conta solamente pa islanan ABC, pues no otro isla of paisnan. “Asina un bubble ta funciona” e mandatario a bisa. E no ta compronde cu tabatin confusion pasobra e tabata hopi ‘duidelijk’. Sinembargo, hendenan cu a yega Aruba, cu no ta residente y cu no a vacuna, mester a pasa un test toch. Y esaki e biaheronan no tabata prepara pe.