Palma Group ta celebra 30 aña anunciando proyecto grandi di vivienda pa localnan

(ADVERTORIAL)

ORANJESTAD - Awe Palmaruba Group hunto cu Gobierno di Aruba ta anuncia orguyosamente e proyecto Caribbean Town Villas & Apartments situa den e bario di Eagle. Ta trata aki di un proyecto residencial di no menos cu 330 unidad riba un tereno di aproximadamente 42.000 m2. Ey lo construi 4 edificio grandi di 7 piso cada un, mas 32 cas para riba nan mes. Ta un inversion di mas of menos 65 miyon florin, basa riba financiamento local y dedica specialmente pa e mercado local tambe.

Ingeniero Victor Acosta di Palmaruba Group a splica cu e proyecto lo tin un duracion di mas of menos dos aña y mey y cu lo percura pa bastante cupo di trabou, sea directamente como indirectamente. E compania ultimo tempo a inverti den varios proyecto residencial pa e sector turistico pero ta sinti cu e compania a desaroya, madura y ta financieramente solido pa por start awor cu un proyecto residencial pa local. E diferencia den esaki ta cu ta percura pa wanta e prijsnan hopi abou, pa por ta pagabel pa nos mesun hendenan.

E proyecto di condominio ta un poco diferente na proyectonan existente awendia. E lo bira un comunidad cera, cu un cura y cu entrada cera y priva exclusivamente pa e residentenan. Den e comunidad lo inclui piscina, un multisport court, un speeltuin, un park pa bestia, oficina pa polis di bario, punto di control di siguridad, un sitio di utilidad y servicionan, area comercial cu minimarket y asina por sigui menciona. 

"Si tur cos ta bon, nos lo ta cla pa pone e prome piedra den mas of menos cuater luna", asina ing. Victor Acosta a sigura awe mainta cu un sonrisa grandi riba su cara. E proyecto aki ta canando pa tres aña caba y hunto cu DIP, DOW y Gobierno, a finalisa cu tur permisonan pa por anuncia e proyecto grandi aki. E intencion ta pa ehecutivonan hoben y tur otro hende por yega na nan propio cas of apartamento y asina biba independiente den un comunidad cu tin acceso na tur necesidad pa por biba trankil. Pa por a logra yega na un modelo di negoshi den cual por ofrece prijsnan mas abou pa e propiedadnan, a haya hopi sosten y cooperacion di gobierno pa por a yega na un tereno. 

Palmaruba Group ta existi desde 1991 y ta responsabel pa varios proyecto residencial, di condominio y di hotel riba nos isla. Entre e lista largo di proyectonan, ta figura entre otro Villas Montaña Alta, complehodi apartamento na Boegoeroei, Ponton Plaza, Villas Gran Sabana na Sabana Liber, Montaña Plaza, Palma Real na Palm Beach, Hooiberg Plaza, Calbas Plaza, Oceania Residence, PalmAruba Condos y mas. Nan tin un bon nomber den comunidad pa ta cumpli y finalisa tur nan proyectonan, pa cual banconan local semper a sostene nan iniciativanan residencial.